पूर्व उपनगरांमध्ये पाणीच पाणी!
चेंबूर, टिळकनगर, चुनाभट्टी, नेहरूनगर, कुर्ला परिसरात कोंडी
चेंबूर ता. १६ (बातमीदार) ः मुंबईसह उपनगरांमध्ये शनिवारी (ता. १६) झालेल्‍या मुसळधार पावसाने मुंबईकरांची तारांबळ उडवून दिली. सकाळपासून मुसळधार पावसाला सुरुवात झाल्याने चेंबूर, टिळकनगर, चुनाभट्टी, नेहरूनगर, रेल्वेस्थानक, माहुल, विक्रोळी, भांडुप, कुर्ला परिसरात पाणी साचले. कामावर जाताना लोकांना पाण्यातून वाट काढताना तारेवरची कसरत करावी लागली.
चेंबूर परिसरातील टेम्बे पूल, एन. जी. आचार्य मार्ग, रेल्वेस्थानक, टिळकनगर रेल्वेस्थानक, शेल कॉलनी, खारदेवनगर, घाटला, गोवंडी, मानखुर्द, देवनार, शिवाजीनगर, सिद्धार्थ कॉलनी, वाशी नाका, पोस्टल कॉलनी, माहुल गांव परिसरात व मार्गावर गुडघाभर पाणी साचले होते. त्यामुळे कोंडी झाली होती.
चुनाभट्टी परिसरातील स्वदेशी मिल वसाहतीमधील घराघरात पाणी शिरले होते. के. जे. सोमय्या येथील मोठ्या नाल्‍याची साफसफाई न झाल्‍याने समर्थनगर, आंबेकरनगर, भक्ती धाम रोड, गुलमोहर मार्ग, एव्हरार्डनगर हायवे मार्ग पाण्याखाली गेला होता. चुनाभट्टी, बीकेसी उड्डाणपुलाखाली गुडघाभर पाणी साचले आहे. भुयारी मार्ग पाण्याखाली गेल्याने प्रवाशांवर घाणीच्या पाण्यातून चालण्याची वेळ आली आहे. सायन व ठाणे मार्गावर मोठ्या प्रमाणात वाहतूक कोंडी झाली होती.
चेंबूर, चुनाभट्टी, टिळकनगर, कुर्ला रेल्वेस्थानक परिसरातील रुळांवर पाणी साचले होते. त्यामुळे या मार्गावरील लोकल धीम्या गतीने होती.