जिवंत काडतुसांसह तिघे अटकेत
नवी मुंबई, ता. १७ : कोपरखैरणे परिसरात पोलिसांनी गस्त घालताना गावठी सुरी आणि जिवंत काडतुसे बाळगणाऱ्या तिघांना अटक केली आहे. १५ ऑगस्ट स्वातंत्र्यदिनाच्या पार्श्वभूमीवर शहरभर कडक बंदोबस्त ठेवण्यात आला असून, त्यादरम्यान ही कारवाई करण्यात आली. अटक केलेल्यांमध्ये सौतमार्तान प्रकाश सिंह (२४) रा. सेक्टर-१९ कोपरखैरणे, मूळगाव परवेजनगर, जिल्‍हा बदायू, उत्तर प्रदेश, पिंटू सोम्पालकुमार (२२) रा. सेक्टर-१९ कोपरखैरणे, मूळगाव राजघाट, जिल्‍हा बुलंदशहर, उत्तर प्रदेश आणि अभय बॉबी राजपूत (२४) रा. सेक्टर-१९ कोपरखैरणे यांचा समावेश आहे. १४ ऑगस्ट रोजी बीट मार्शल पोलिस हवालदार ललित महाजन यांना शांतीदूत महावीर उद्यानाजवळ सार्वजनिक शौचालयाशेजारी पेट कॉर्नर येथे काही संशयित व्यक्ती जमल्याची माहिती मिळाली. ही माहिती वरिष्ठ पोलिस निरीक्षक औदुंबर पाटील यांना समजताच त्यांनी पोलिस उपनिरीक्षक उमेश शेडगे व पोलिस कर्मचाऱ्यांना घटनास्थळी रवाना केले. तपासणीदरम्यान त्यांच्याजवळून गावठी सुरी व एकूण सहा जिवंत काडतुसे आढळून आली. या शस्त्रास्त्रांची किंमत अंदाजे ३६ हजार रुपये असल्याचे पोलिसांनी सांगितले.