भाईंदर, ता. १७ (बातमीदार) : मिरा-भाईंदर महापालिकेच्या शिक्षण विभागात शिक्षणाधिकारी हे पद गेल्या आठ महिन्यांपासून रिक्त आहे. शिक्षणाधिकारी नसल्यामुळे शहरातील शाळा व पालक यांना विविध अडचणींना तोंड द्यावे लागत असल्याने राज्य सरकारने शिक्षणाधिकाऱ्यांची तातडीने नियुक्ती करावी, अशी मागणी माजी नगरसेवक अजित पाटील यांनी शालेय शिक्षण राज्यमंत्र्यांकडे केली आहे.

महापालिकेच्या शिक्षण विभागासाठी राज्य सरकारकडून प्रतिनियुक्तीने शिक्षणाधिकाऱ्यांची नेमणूक केली जाते. शहरातील खासगी शाळांच्या कारभारावर लक्ष ठेवणे, त्यांचे विविध प्रस्ताव मान्यता देऊन राज्य सरकारच्या शिक्षण विभागाकडे पाठवणे, शाळाचालक, मुख्याध्यापक व पालकांना भेडसावणाऱ्या समस्यांवर तोडगा काढणे आदी कामांसह महापालिकेच्या शाळांच्या कारभारावरही लक्ष ठेवणे आदी महत्त्वपूर्ण कामे शिक्षणाधिकाऱ्यांकडून केली जातात.

महापालिकेत नियुक्त शिक्षणाधिकाऱ्यांची आठ महिन्यांपूर्वी अन्यत्र बदली झाली, तेव्हापासून हे पद रिक्त आहे. महापालिकेने त्याजागी स्वत:च्या एका अधिकाऱ्याची नेमणूक करून तात्पुरता तोडगा काढला आहे, परंतु शासन नियुक्त शिक्षणाधिकाऱ्यांना शैक्षणिक, तसेच शाळांविषयक नियम, कायदे, शासन आदेश, परिपत्रके याची सखोल माहिती असते. त्यामुळे त्यांचे खासगी शाळांवर प्रभावी नियंत्रण राहते, तसेच त्यांच्याकडून सरकारच्या धोरणांची परिणामकारक अंमलबजावणी होत असते. यासाठी मिरा-भाईंदर महापालिकेतील शिक्षणाधिकारी पदावर तातडीने नियुक्ती करावी, अशी मागणी माजी नगरसेवक अजित पाटील यांनी शालेय शिक्षण राज्यमंत्री डॉ. पंकज भोयर यांच्याकडे केली आहे.