चिमुकलीला वाचवण्यासाठी धरणात आजीची उडी
ग्रामस्थांच्या धाडसाने वाचले दोघांची प्राण
कर्जत, ता. १७ (बातमीदार) : तालुक्यातील पळसदरी धरणात रविवारी (ता. १७) सहा वर्षांची भाविष्का वर्मा ही चिमुकली पाण्याच्या जोरदार प्रवाहात अचानक वाहून गेली. तिचा जीव वाचवण्यासाठी ५५ वर्षीय आजी नरशम्मा शिंदे यांनी कोणताही विचार न करता पाण्यात उडी घेतली. घटनास्थळी उपस्थित ग्रामस्थांनी क्षणार्धात परिस्थितीचा अंदाज घेत प्रसंगावधान दाखवत दोघांनाही वाचवले. विशाल निगुडकर, भावेश पलांडे, ज्ञानेश्वर सुर्वे, विनय सुर्वे, विनया खोपकर, नितीन पवार, सौरभ खोपकर, सचिन पवार, नरेश गंगावते, सनी पाटील आणि पळसदरी वाडीतील अन्य ग्रामस्थांनी मिळून धाडस दाखवत दोघांना सुरक्षित बाहेर काढले.

या प्रसंगानंतर १०८ रुग्णवाहिकेला संपर्क करण्यात आला; मात्र ती उशिरा पोहोचली. आजीसाठी आलेली रुग्णवाहिका चारफाटा येथे बंद पडली, त्यामुळे वेळेचा मोठा अपव्यय झाला. दरम्यान, विशाल निगुडकर यांनी स्वतःच्या वाहनातून भाविष्काला तातडीने कर्जत उपजिल्हा रुग्णालयात दाखल केले. नंतर आजी व नात दोघींनाही पुढील उपचारासाठी मातोश्री हॉस्पिटल व कल्याणमधील खासगी रुग्णालयात हलवण्यात आले.

भाविष्का वर्मा आणि नरशम्मा शिंदे यांच्यावर सध्या उपचार सुरू असून, त्यांची प्रकृती स्थिर आहे. या धक्कादायक प्रसंगाने गावात एकच खळबळ उडाली असली तरी, ग्रामस्थांनी दाखवलेली तत्परता आणि माणुसकीमुळे एका कुटुंबाचे प्राण वाचले.