मुख्य रस्त्याला तलावाचे स्वरूप
नागरिक-विद्यार्थी बेजार, प्रशासनाचे दुर्लक्ष
रोहा, ता. १७ (बातमीदार) ः मुंबई-गोवा महामार्गानजीक कोलाड भागातील गोवे गावातील मुख्य रस्त्याला तलावाचे स्वरूप आले आहे. चिखलयुक्त पाणी व खड्ड्यातून प्रवास करताना नागरिक बेजार झाले असून संबधित प्रशासनाकडून या गंभीर विषयांकडे दुर्लक्ष होत असल्याने स्थानिकांमध्ये कमालीची नाराजी पसरली आहे.
मुंबई-गोवा महामार्गाच्या कामामुळे येथील गोवे गावाकडे जाणारा ५०० मीटरच्या रस्त्याचे काम रखडले आहे. ठेकेदाराच्या आडमुठ्या धोरणामुळे येथील जनतेला नाहक त्रास सहन करावा लागत आहे. संबधित ठेकेदाराने गोवे गावाकडे जाणाऱ्या मुख्य रस्त्यावर भराव टाकल्याने अवस्था बिकट झाली आहे. तर गोवे गावाच्या स्थानकाजवळ पलीकडे जाण्यासाठी जागा ठेवली नसल्याने नागरिकांना तारेवरची कसरत करावी लागत आहे. यामुळे एखादा मोठा अपघात झाला तर याला जबाबदार कोण, असा सवाल जनतेतून उपस्थित होत आहे.

ग्रामस्थांचे आंदोलन
गेल्यावर्षी या रस्त्यासंदर्भात गोवे ग्रामस्थांनी आंदोलन केले होते. यानंतर हा रस्ता लवकरच लवकर पूर्ण करण्याचे आश्वासन संबंधित ठेकेदाराने दिले होते; मात्र अद्यापही या रस्त्याचे काम अपूर्ण असल्याने रस्त्यावर खड्डे पडले आहेत. या खड्ड्यात पावसाचे पाणी तुंबत असल्याने नागरिकांची मोठ्या प्रमाणात गैरसोय होत आहे.

फोटो कॅप्शन :
रोहा ः पावसाचे पाणी तुंबल्याने रस्त्याला तलावाचे स्वरूप आले आहे.