शॉर्टसर्किटमुळे सोसायटीला आग
सकाळ वृत्तसेवा
डोंबिवली, ता. १९ : डोंबिवली पश्चिमेतील राजूनगरमधील श्रद्धा सोसायटीत सोमवारी (ता. १८) पहाटे चार ते पाचच्या सुमारास शॉर्टसर्किटमुळे आग लागल्याची घटना घडली. सोसायटीच्या मीटर बॉक्समध्ये ही आग लागल्याने आगीने त्वरित रौद्र रूप धारण केले. नागरिकांनी याची माहिती कल्याण- डोंबिवली अग्निशमन दलाला दिली. घटनेची माहिती मिळताच अग्निशमन दलाचे जवान त्वरित घटनास्थळी दाखल झाले. तासाभराच्या प्रयत्नानंतर आगीवर नियंत्रण मिळविण्यात जवानांना यश आले. अग्निशमन दलाच्या जवानांनी व नागरिकांनी प्रसंगावधान राखत इमारत त्वरित खाली केली. त्यामुळे मोठा अनर्थ टळला. या दुर्घटनेत कोणतीही जीवितहानी झाली नाही. इमारतीच्या वायर्स आणि मीटर बॉक्स जळून मात्र मोठे नुकसान झाले असल्याची माहिती अग्निशमन दलाने दिली.