अलिबाग, ता. २३ (वार्ताहर)ः रायगड जिल्हा परिषदेच्या वित्त विभागातील दोघा कर्मचाऱ्यांसह एका ठेकेदाराला लाच घेताना शुक्रवारी (ता. २२) दुपारी लाचलुचपत प्रतिबंधक विभागाने पकडले होते. या तिघांना सोमवार (ता. २५)पर्यंत पोलिस कोठडी दिली आहे.
मुंबई-गोवा राष्ट्रीय महामार्गालगत पेण तालुक्यातील शेणे गावात केंद्र शासनाच्या जलजीवन मिशनअंतर्गत २०२२-२३ मध्ये पाणीपुरवठा प्रकल्पाचे काम वडखळ येथील एमएसएस कन्स्ट्रक्शन ठेकेदाराला मिळाले होते; मात्र वेळेअभावी कामाची जबाबदारी व कायदेशीर प्रक्रिया तक्रारदार यांच्याकडे सोपवण्यात आली. त्यांनी १५ जुलै २०२५ रोजी पूर्ण केले. यानंतर उर्वरित ६९ लाखांचे देयक मंजूर व्हावे, म्हणून जिल्हा परिषदेत पाठपुरावा करत होते. या देयकासाठी शिपाई दिलीप कावजी यांनी ३५ हजारांची लाच मागितली. तडजोडीनंतर रक्कम २५ हजारांवर निश्चित झाली. ठरल्याप्रमाणे ही रक्कम स्वीकारताना लाचलुचपत विभागाने सापळा रचून कारवाई केली. या प्रकरणात रायगड जिल्हा परिषदेच्या वित्त विभागातील कनिष्ठ सहाय्यक लेखा आशीष कांबळे (३६), शिपाई दिलीप कावजी (५६), खासगी ठेकेदार विलास ढेबेला (२९) लाच स्वीकारताना ताब्यात घेतले. याप्रकरणी अलिबाग पोलिस ठाण्यात गुन्हा दाखल आहे.