आंतरराष्ट्रीय हायड्रो गांजा तस्करी
नवीन चिंचकरचा भाऊ धीरज चिंचकर अटकेत
नवी मुंबई, ता. २३ (वार्ताहर) : आंतरराष्ट्रीय हायड्रो गांजा तस्करी प्रकरणात मुंबई पोलिसांनी मोठी कारवाई करीत मुख्य आरोपी नवीन चिंचकरचा भाऊ धीरज चिंचकर याला गुरुवारी (ता. २१) अटक केली आहे. या अटकेमुळे आता या प्रकरणातील एकूण आरोपींची संख्या २४ झाली आहे. धीरज चिंचकर थायलंडमध्ये या ड्रग नेटवर्कचा भाग होता, अशी माहिती पोलिसांनी दिली आहे. पोलिसांनी यापूर्वीच न्यायालयात या प्रकरणाचे दोषारोपपत्र दाखल केले आहे. या कारवाईत एकूण तीन कोटींचा हायड्रो गांजा जप्त करण्यात आला आहे.
या प्रकरणात मुंबई पोलिसांनी नेरूळमध्ये छापा टाकून दोन आरोपींना हायड्रो गांजासह अटक केली होती. त्यानंतर या प्रकरणाची पाळेमुळे आंतरराष्ट्रीय स्तरावर पसरलेली असल्याचे समोर आले. या तस्करीत थायलंडमधून एअर कुरिअरने गांजा भारतात आणला जात होता. या रॅकेटमध्ये दोन पोलिस कर्मचारी, एक कस्टम अधिकारी आणि दोन आंगडिया (कुरिअर) यांचा समावेश होता. त्यांना यापूर्वीच अटक करण्यात आली आहे.
मागील महिन्यात पोलिसांनी मुख्य सूत्रधार नवीन चिंचकर याला मलेशियातून भारतात आणून अटक केली होती. आता त्याचा भाऊ धीरजलाही अटक करण्यात आली असून, न्यायालयाने त्याला पोलिस कोठडी सुनावली आहे. या प्रकरणातील इतर आरोपींचा शोध सुरू असल्याचेही पोलिसांनी सांगितले आहे.