बाप्पाच्या आगमनात खड्ड्यांचे विघ्न
सकाळ वृत्तसेवा
ठाणे, ता. २३ : गणपती उत्सव सध्या अवघ्या दोन-तीन दिवसांवर येऊन ठेपला आहे. अशा परिस्थितीत ठाणे, कल्याण-डोंबिवली, भिवंडी, शहापूर, मुरबाड, बदलापूर, अंबरनाथ, उल्हासनगर या भागांतील रस्त्यांची सद्य:स्थिती चिंताजनक आहे. याबाबत ‘सकाळ’ने आढावा घेतला आहे. पावसाळा आणि रस्त्यांवर पडणारे खड्डे ठाणे जिल्ह्यातील वाहतुकीसाठी मोठा प्रश्न ठरत आहेत. मुंबई, वसई, पालघर, गुजरात अशा महत्त्वाच्या भागांना जोडणाऱ्या महामार्गांवर पावसाळ्यात खड्ड्यांमुळे वाहतूक कोंडी टाळण्यासाठी प्रशासनाने लाखो रुपये खर्च करून खड्डे बुजविण्याचे काम केले आहे, असा प्रशासनाकडून दावा केला जात आहे. दरम्यान, मुसळधार पावसामुळे ही कामे थांबली असून, आधी बुजविलेले खड्डे पुन्हा उघडे होत असल्याने वाहनचालकांसाठी, विशेषतः दुचाकीस्वारांसाठी जीवघेणे ठरत आहेत.

ठाणे पालिका क्षेत्रातून जाणारा घोडबंदर मार्ग वसई आणि गुजरातकडे जाणारा महत्त्वाचा महामार्ग असून, या मार्गावर मोठ्या प्रमाणात घरसंस्कृती आणि नागरिकसंख्या वाढली आहे. त्याबरोबरच वाहनांची संख्या वाढल्यामुळे येथील वाहतूक कठीण झाली आहे. गेल्या काही वर्षांपासून येथे मेट्रो प्रकल्प व रस्त्यांची जोडणी कामे सुरू आहेत. यामुळे वाहतुकीला मोठा अडथळा निर्माण झाला आहे. याचाच परिणाम म्हणून नागरिकांना या मार्गावर रस्त्यावरील उड्डाणपुलांवर पडलेल्या खड्ड्यांचा सामना करावा लागत आहे.

विशेषतः वाघबीळ, पातलीपाडा, मानपाडा आणि माजिवडा या उड्डाणपुलांवर काही दिवसांपूर्वी पावसामुळे मोठमोठे खड्डे पडले होते. यासाठी संबंधित यंत्रणांनी मास्टिक पद्धतीने तात्पुरते खड्डे बुजविले, मात्र सततच्या पावसामुळे काही ठिकाणी रस्ते उखडले असून, रस्त्यांची अवस्था पुन्हा खराब झाल्याचे दिसून येते.

भिवंडीतील रस्त्यांची दुरवस्था
भिवंडी (वार्ताहर) : भिवंडीमध्येही पावसाळ्यात खड्ड्यांचे प्रमाण वाढले असून, अनेक रस्ते वेळेवर दुरुस्त न केल्यामुळे खड्ड्यांचे साम्राज्य पसरले आहे. शहरातील अनेक रस्त्यांवर काँक्रीटीकरण करणे सुरू असले तरी कामे हळूहळू होत असल्यामुळे रस्त्यांच्या दुरवस्थेत सुधारणा झालेली नाही. विशेषतः कल्याण नाका ते भादवड, आसबीबी ते गायत्रीनगर पद्मानगर, गौरीपाडा मंडई आणि कल्याण नाका ते धामणकर नाका या भागातील रस्त्यांची स्थिती खड्ड्यांमुळे बिकट झाली आहे. यामुळे नागरिकांमधून संताप व्यक्त करण्यात येत आहे.