खड्ड्यांमुळे डॉक्टरचा दुर्दैवी मृत्यू
नागरिकांचा संताप
भिवंडी, ता. २३ (वार्ताहर) : शहरातील वंजारपट्टी नाका परिसरातील सिराज हॉस्पिटलजवळ रस्त्यावर पडलेल्या खड्ड्यांमुळे एका डॉक्टरचा दुर्दैवी मृत्यू झाला आहे. मृत्यू झालेल्या डॉक्टरचे नाव डॉ. मोहम्मद नसीम अमीनुद्दीन अन्सारी (वय ५८) असे आहे.

डॉ. नसीम अन्सारी रात्री ढाब्यावर जेवण करून शुक्रवारी (ता. २२) मध्यरात्री साडेबाराच्या सुमारास त्यांच्या दुचाकीने नागाव येथील घरी परतत होते. सिराज हॉस्पिटलच्या समोर असलेल्या रस्त्याच्या काँक्रीट आणि डांबरी मार्गात पडलेल्या खोल खड्ड्यांमुळे त्यांच्या दुचाकीचा तोल बिघडला आणि ते रस्त्यावर पडले. त्याच वेळी त्यांच्या जवळून जाणाऱ्या ट्रकच्या मागील टायरखाली येऊन त्यांचा जागीच मृत्यू झाला. या दुर्दैवी घटनेनंतर स्थानिक नागरिकांनी मोठा संताप व्यक्त करीत काही वेळ रस्ता रोखून निदर्शने केली. सहाय्यक पोलिस आयुक्त सचिन सांगळे आणि निजामपूर पोलिस ठाण्याचे वरिष्ठ पोलिस निरीक्षक विश्वास डगळे घटनास्थळी पोहोचून नागरिकांना शांत करून परिस्थिती नियंत्रणात आणली. पुढे ट्रक क्रमांक जीजे १५ एटी ०५०६चा चालक मोहम्मद बिलाल मोहम्मद अस्लम याविरुद्ध गुन्हा दाखल करून ताब्यात घेण्यात आले.

शहरातील अनेक रस्त्यांवर खोल खड्डे असून, काँक्रीट रस्त्याच्या बाजूला डांबरी किंवा फेव्हरब्लॉक लाऊन बनवलेल्या रस्त्यांमध्ये असलेल्या गॅपमुळे अपघातांची शक्यता वाढली आहे. मात्र याकडे पालिका प्रशासनाकडून दुर्लक्ष केले जात आहे. यामुळे रस्त्यांची अवस्था खराब होऊन नागरिकांची जीवितहानी होण्याची भीती निर्माण झाली आहे. स्थानिक नागरिकांनी अवजड वाहने या ठिकाणी येणारी वाहतूक तातडीने थांबवावी, तसेच रस्त्यांचे दुरुस्तीचे काम त्वरित करण्याची मागणी केली आहे.

रस्त्याची दुरुस्ती
घटनेनंतर स्थानिक नागरिकांनी त्या खोल खड्ड्यांत खडी टाकून तात्पुरती रस्ता दुरुस्ती करण्याचा प्रयत्न केला; मात्र यासाठी अधिक तातडीने आणि दीर्घकालीन उपाययोजना करणे आवश्यक असल्याचे स्थानिकांनी ठळकपणे नमूद केले आहे.