चिमुकल्या हातांनी साकरल्या पर्यावरणपूरक गणेशमूर्ती
नेरूळ, ता.२३ (बातमीदार) ः गणेशोत्सव पर्यावरणपूरक व प्लास्टिकमुक्त साजरा करण्यासाठी नवी मुंबई महापालिका आयुक्त डॉ.कैलास शिंदे यांच्या वतीने आवाहन करण्यात आले आहे. या अनुषंगाने शालेय स्तरावरूनही विविध उपक्रमांचे आयोजन करण्यात येत आहे. विद्यार्थ्यांच्या मनात असलेल्या गणेशोत्सवाच्या आकर्षणाला पर्यावरणाची जोड देत विद्यार्थ्यांसाठी शाडू मातीपासून श्रीगणेशमूर्ती बनविण्याची कार्यशाळा करावे गावातील ज्ञानदीप प्राथमिक शाळेत उत्साहात पार पडली.
यामध्ये शाळेतील इयत्ता तिसरी ते सातवीच्या विद्यार्थ्यांनी शाडूच्या मातीपासून सुंदर, सुबक आणि आकर्षण गणेश मूर्ती तयार केल्या. या गणेशमूर्ती कार्यशाळेत शाळेत १०० हून अधिक विद्यार्थ्यांनी उत्साही सहभाग घेतला. आपल्या स्वत:च्या हातांनी गणपतीच्या सुबक मूर्ती बनविण्याचा आनंद शाळेतील बालमूर्तीकारांच्या चेहऱ्यावर ओसंडून वाहत होता. या छोट्या कलाकारांनी लहानग्या हातांनी शाळेतील चित्रकला शिक्षिका प्राजक्ता गर्जे व रेश्मा नाईक यांच्या मार्गदर्शनाखाली आणि शाळेतील शिक्षकांच्या सहकार्याने आकर्षक गणेश मूर्ती तयार केल्या. कार्यशाळेचे नियोजन शाळेचे मुख्याध्यापक बंकट दिनकर तांडेल यांनी केले होते. या कार्यशाळेसाठी पालिकेचे स्वच्छता अधिकारी विजय नाईक यांचे सहकार्य लाभले.