गणेशोत्सवासाठी कोकणवासीयांची गर्दी
मुंबई-गोवा महामार्गावर वाहनांच्या लांबच लांब रांगा
माणगांव, ता. २३ (बातमीदार) : गणेशोत्सवासाठी मुंबई, पुणे आणि सुरत यांसारख्या शहरांमधून कोकणात जाणाऱ्या कोकणवासीयांच्या वाहनांमुळे मुंबई-गोवा महामार्गावर मोठी वाहतूक कोंडी झाली आहे. माणगावजवळ शनिवारी (ता. २३) वाहनांच्या लांब रांगा दिसून येत आहेत. यामुळे प्रवाशांना वाहतूक कोंडीचा सामना करावा लागत आहे. माणगावात येताना वाहनांच्या तीन किमी रांगा लागल्याने प्रवासी मेटाकुटीला आले होते.
कोकणवासीयांचा प्रवास सुखकर व्हावा, यासाठी माणगाव शहरात आणि महामार्गावर मोठा पोलिस बंदोबस्त तैनात करण्यात आला आहे. शहरातील निजामपूर नाका येथे मुंबई, पुणे आणि गोवा असे तीनही मार्ग एकत्र मिळतात. त्यामुळे गणपती, होळी, दिवाळी यांसारख्या सणांच्या काळात माणगाव शहरात प्रचंड वाहतूक कोंडी होते. या वेळी दूर कोकणात जाणाऱ्या-येणाऱ्या व स्थानिकांना प्रवासादरम्‍यान मोठ्या त्रासाला सामोरे जावे लागते. त्यामुळे वाहतूक सुरळीत ठेवण्यासाठी सहा उपविभागीय पोलिस अधिकारी, १० पोलिस निरीक्षक, ५२ पोलिस उपनिरीक्षक आणि ४०५ अंमलदार दिवसरात्र काम करीत आहेत. अनधिकृत पार्किंग आणि वाहतुकीचे नियम तोडणाऱ्यांवर पोलिसांची करडी नजर आहे.
गणपती बाप्पाच्या स्वागतासाठी माणगाव बाजारपेठेतही उत्साह संचारला आहे. सजावटीचे साहित्य आणि आकर्षक गणेशमूर्ती विक्रीसाठी उपलब्ध झाल्या आहेत.

बस स्थानकात बदल
या वर्षी वाहतूक कोंडी टाळण्यासाठी माणगांवमधील बस स्थानकातही बदल करण्यात आला आहे. मुंबईहून येणाऱ्या बस खिलार हॉटेलजवळ थांबतील, तर मुंबईकडे जाणाऱ्या बस आर्या हॉटेल येथून सुटतील. स्वयंसेवकही वाहतूक नियंत्रणासाठी पोलिसांना मदत करीत आहेत.