विजेची तार पडून चिमुकल्याचा मृत्यू
कर्जत, ता. २३ (बातमीदार) : कर्जत तालुक्यातील नसरापूर ग्रामपंचायत हद्दीतील सालवड गावात शनिवारी (ता. २३) महावितरणची मुख्य वीजवाहिनी अंगावर पडल्याने शिव रुपेश भोसले (वय ९) या चिमुकल्याचा मृत्यू झाला. या घटनेमुळे परिसरात शोककळा पसरली असून, महावितरणच्या गलथान कारभारावर तीव्र संताप व्यक्त होत आहे.
शिव शनिवारी दुपारी अडीचच्या सुमारास आपल्या घराबाहेर रस्त्यावरून जात असताना अचानक वीजवाहिनी तुटून त्याच्या अंगावर पडली. या अपघातात तो गंभीर जखमी झाला. त्याला तातडीने कर्जत उपजिल्हा रुग्णालयात दाखल करण्यात आले, परंतु डॉक्टरांनी तपासणीअंती त्याला मृत घोषित केले. या घटनेची माहिती मिळताच कर्जत पोलिसांनी घटनास्थळी धाव घेतली. संतप्त नातेवाईक आणि ग्रामस्थांनी महावितरणच्या निष्काळजीवर जोरदार टीका केली.
गावातील ३० वर्षांहून अधिक जुन्या आणि जीर्ण झालेल्या विजेच्या तारांमुळे अशी दुर्घटना घडल्याचे ग्रामस्थांचे म्हणणे आहे. गेल्या अनेक वर्षांपासून वीजग्राहक संघर्ष समिती जुन्या तारा बदलण्याची मागणी करीत आहे; मात्र याकडे दुर्लक्ष झाल्यामुळे ही घटना घडल्याचा आरोप ग्रामस्थांनी केला आहे. या घटनेनंतर प्रशासनाने तत्काळ लक्ष घालून सर्व जुन्या व धोकादायक वीजतारा बदलण्याची मागणी जोर धरत आहे.