खासगीकरणाविरोधात काँग्रेस आक्रमक
मालवणी टाऊनशिप शाळेसमोर आंदोलन

मुंबई, ता. २३ : महापालिकेच्या मालवणी टाऊनशिप शाळेच्या खासगीकरणावरून काँग्रेस आणि भाजपमध्ये जोरदार खडाजंगी उडाली आहे. याविरोधात काँग्रेसने शनिवारी (ता. २३) जोरदार आंदोलन केले. महापालिकेच्या शाळा भाजप सरकार स्वयंसेवी संस्थांच्या नावाखाली खासगी लोकांच्या हाती देत असल्याचा आरोप मुंबई काँग्रेसने केला आहे. या वेळी खासदार वर्षा गायकवाड, आमदार अस्लम शेख यांनी पालकांसह शाळेसमोर आंदोलन केले.

‘मुंबई महापालिकेच्या मालवणी टाऊनशिप शाळेचे खासगीकरण करून ही शाळा काही विशिष्ट लोकांच्या हाती दिली जात आहे. यामुळे वंचित आणि उपेक्षित घटकांतील विद्यार्थ्यांच्या शिक्षणाचा अधिकार डावलला जात आहे. भाजप सरकारचा हा कुटील डाव आम्ही हाणून पाडू,’ असा इशारा या वेळी खासदार गायकवाड यांनी दिला. या वेळी मंत्री मंगलप्रभात लोढांना भेटण्याचा काँग्रेस शिष्टमंडळाने प्रयत्न केला; मात्र पोलिसांनी त्यांना भेटू दिले नाही, त्यामुळे संतप्त झालेल्या या शिष्टमंडळाने पालकमंत्री मंगलप्रभात लोढा यांना बांगड्यांचा आहेर दिला. दरम्यान, मुंबई महापालिकेच्या शासन निर्णयानुसार सद्यःस्थितीत खासगी संस्थांच्या सहकार्याने ३० ते ३५ शाळा चालवत आहेत आणि त्यात मालवणी टाऊनशिप शाळेचाही समावेश असल्याचे लोढा यांनी सांगितले. प्रयास फाउंडेशनच्या पुढाकारामुळे मालवणी भागातील विद्यार्थ्यांचे भविष्य सुरक्षित होत आहेत. शाळेच्या विकासकामांसाठी एक कोटी रुपयांची तरतूद केली आहे. या निधीतून शाळेत वेगवेगळ्या सुविधा उपलब्ध करून देण्यात येणार असल्याचे लोढा यांनी या वेळी सांगितले.

गेल्या दशकांहून अधिक काळ अस्तित्वात असलेल्या मालवणी टाऊनशीप शाळेचे मनमानी खासगीकरण करण्याचा सरकारचा डाव आहे. ‘यूपीए’ सरकारने मुलांना मोफत व सक्तीच्या शिक्षणाचा कायदा आणला. भाजप सरकार हा मूलभूत अधिकारदेखील गोरगरिबांकडून हिरावून घेत आहे.
- वर्षा गायकवाड, खासदार, मुंबई, काँग्रेस अध्यक्ष

शासनाकडून दर्जेदार सुविधा विद्यार्थ्यांना उपलब्ध करून दिल्या जात आहे. त्यासाठी कोणतेही शुल्क आकारले जाणार नाही. पालकांनी विरोधकांच्या अपप्रचाराला बळी पडू नये.
- मंगलप्रभात लोढा, पालकमंत्री
...