सावित्रीबाई फुले नाट्यगृहासाठी ३५ कोटींचा निधी
पहिल्या टप्प्यात १५ कोटी पालिकेकडे वर्ग
कल्याण, ता. २३ (वार्ताहर) : डोंबिवली येथील सावित्रीबाई फुले नाट्यगृहाचा लवकरच चेहरामोहरा बदलणार आहे. काही दिवसांपूर्वी अंतर्गत भागात झालेल्या पडझडीनंतर नाट्यगृहाच्या विकासासाठी निधीची मागणी खासदार डॉ. श्रीकांत शिंदे यांनी उपमुख्यमंत्री एकनाथ शिंदे यांच्याकडे केली होती. त्यानंतर नगरविकास विभागाने या नाट्यगृहासाठी ३५ कोटींचा निधी उपलब्ध करून दिला आहे. त्यातील १५ कोटी रुपयांचा निधी कल्याण-डोंबिवली महापालिकेकडे वर्ग केला आहे. त्यामुळे नव्या रूपातले नाट्यगृह लवकरच प्रेक्षकांच्या भेटीला येणार आहे.

डोंबिवली हे कला आणि नाट्यरसिकांची पंढरी म्हणूनही ओळखली जाते. त्यामुळे परिसरातील नाट्यरसिकांसाठी कल्याण-डोंबिवली महापालिकेचे सावित्रीबाई जोतीराव फुले नाट्यगृह हे हक्काचे ठिकाण आहे; मात्र काही दिवसांपूर्वी येथील नाट्यगृहात प्रेक्षाकांच्या खुर्च्यांवरचा काही भाग पडला होता. रात्रीच्या सुमारास हा प्रकार झाला होता. त्यामुळे कुणालाही इजा झाली नव्हती. त्यानंतर कल्याण-डोंबिवली महापालिकेने हे नाट्यगृह दुरुस्तीसाठी बंद केले होते. नाट्यगृह बंद झाल्याने नाट्य, कलारसिकांचा हिरमोड झाला होता.
दरम्यान, नाट्यरसिकांनी कल्याण लोकसभा मतदारसंघाचे खासदार डॉ. शिंदे यांच्याकडे निधीची मागणी केली होती. त्यानुसार सावित्रीबाई फुले नाट्यगृहाच्या विकासासाठी नगरविकास विभागाने ३५ कोटींचा निधी मंजूर केला आहे. तर त्यात पहिल्या टप्प्यात १५ कोटी रुपयांचा निधी कल्याण-डोंबिवली महापालिकेच्या खात्यात वर्ग करण्यात आला आहे.