सणांच्या पार्श्वभूमीवर डोंबिवलीत पोलिस मित्रांची बैठक
डोंबिवली, ता. २४ : आगामी गणेशोत्सव आणि ईद-ए-मिलाद या सणांच्या पार्श्वभूमीवर डोंबिवली पोलिस ठाण्याच्या वतीने ‘पोलिस मित्र’ यांची विशेष बैठक घेण्यात आली. या बैठकीत वरिष्ठ पोलिस निरीक्षक गणेश जवादवाड आणि सहाय्यक पोलिस निरीक्षक ईश्वर कोकरे यांनी उपस्थितांना मार्गदर्शन केले. दोन्ही सण शांततेत आणि सुसंवादाच्या वातावरणात पार पडावेत, यासाठी शासनाकडून आलेल्या सूचना आणि दक्षता उपाययोजना यांची माहिती पोलिस मित्रांना देण्यात आली. कोणत्याही प्रकारच्या अफवा पसरू नयेत, यासाठी विशेष सतर्क राहण्याचे आवाहन करण्यात आले. संशयास्पद हालचाली दिसल्यास तत्काळ पोलिसांना माहिती द्यावी, अशाही सूचना या वेळी देण्यात आल्या. या बैठकीस तरुण-तरुणींसह महिलांची उपस्थिती लक्षणीय होती. शांततापूर्ण सणासाठी पोलिस मित्रांचा सहभाग महत्त्वाचा असून, समाजातील सलोखा टिकवण्यासाठी नागरिकांनी पोलिस प्रशासनास सहकार्य करावे, असे आवाहन करण्यात आले.