विहिरीच्या मोटारची वायर पुन्हा गेली चोरीला
ग्रामस्थांच्या पाण्याचा प्रश्न ऐरणीवर
सकाळ वृत्तसेवा
पाली, ता.२४ (वार्ताहर) : सुधागड तालुक्यातील घोटावडे गावातील ग्रामपंचायतीच्या माध्यमातून बसविण्यात आलेल्या विहिरीच्या मोटारीची विद्युत वायर पुन्हा एकदा शनिवारी (ता. 23) मध्यरात्री चोरीला गेल्याने ग्रामस्थांमध्ये प्रचंड संताप पसरला आहे. गावकऱ्यांच्या पिण्याच्या पाण्याचा मुख्य स्त्रोत असलेल्या या मोटारीची वायर वारंवार चोरीस जाणे हा गावासाठी मोठा डोकेदुखीचा विषय बनला आहे.
यामुळे पाण्याचा प्रश्न ऐरणीवर आला असून शिवाय आर्थिक भुर्दंड देखील बसत आहे. गावातील विहिरीतून पाणी टाकीत भरून पुरवले जाते. यासाठी ग्रामपंचायतीकडून खास मोटार आणि वायर लावण्यात आली होती. मात्र ही वायर सतत चोरीला जात असून, याआधी देखील ग्रामस्थांनी पोलीस स्टेशनमध्ये तक्रार नोंदवली होती. तरीदेखील पोलिसांनी या चोरीला आळा घालण्यात कसलीही कार्यवाही न केल्याने चोरांचे मनोबल वाढल्याचे ग्रामस्थांचे मत आहे.
काल मध्यरात्री पुन्हा चोरी झाल्याने नागरिकांमध्ये पोलीस यंत्रणेच्या निष्क्रियतेबाबत जोरदार नाराजी व्यक्त केली जात आहे. सामाजिक कार्यकर्ते चंद्रकांत जगताप यांनी सांगितले की गावातील मोटारीची वायर सतत चोरीला जाते, हे निश्चितच भुरटे चोरांचे काम आहे. पण वारंवार तक्रारी करूनही पोलीस हालचाल करत नाहीत. ही परिस्थिती असह्य आहे असे सांगत पोलीस प्रशासनाला जाग येण्याची मागणी केली आहे. जर पोलिसांनी तत्काळ कारवाई करून चोरट्यांना पकडले नाही, तर ग्रामस्थांना रस्त्यावर उतरावे लागेल, असा इशारा ग्रामस्थांनी दिला आहे.