पुरोहितांची घरोघरी धावपळ
सार्वजनिक मंडळांकडून आगाऊ नोंदणी
वाशी, ता. २६ (बातमीदार)ः घरगुती तसेच सार्वजनिक गणेशोत्सवासाठी पुरोहितांची सध्या मागणी आहे. दरवर्षीप्रमाणे यंदाही गणेशमूर्ती प्रतिष्ठापना, पूजन, आरती, सत्यनारायण महापूजा, विसर्जनाच्या विधींसाठी धावपळ सुरू असून, विविध गणेश मंडळांनी आगाऊ नोंदणी केली आहे.
गणेशोत्सव भक्तिभावाचा उत्सव असला तरी पुरोहितांसाठी व्यस्त हंगाम ठरतो. प्रतिष्ठापनापासून विसर्जनापर्यंत पूजा, आरत्या आणि विशेष विधींमुळे पुरोहितांना जवळपास १० ते १२ तास सतत काम करावे लागते. वाढत्या मागणीमुळे अनेकदा वेळ सांभाळणे कठीण होते. विशेषत: विसर्जनाच्या दिवशी एकाच वेळी अनेक मंडळांकडून पूजनाची मागणी होते. वाढत्या मागणीच्या तुलनेत पुरोहितांची संख्या अपुरी असल्याने अडचणी येत आहेत, पण श्रद्धा आणि परंपरेसोबत आधुनिकतेची सांगड घालणारा हा उत्सव यंदा अधिक उत्साहात साजरा होणार आहे.
------------------------------------
आर्थिकदृष्ट्या महत्त्व
लहान-मोठ्या सोसायट्या, मंडळांकडून पुरोहितांना मानधन दिले जाते. घरगुती पूजेसाठी हजार ते दोन हजार रुपयांपर्यंत तर सार्वजनिक मंडळांत मोठ्या मानधनाची रक्कम मिळते. भाविकांकडून मिळणारे सत्कार, दक्षिणा, प्रसादामुळे पुरोहितांसाठी हा काळ आर्थिकदृष्ट्याही महत्त्वाचा ठरतो.