वधना-निकणे परिसरातील पूल गेला वाहून
ग्रामस्थांनी जिल्हाधिकाऱ्यांकडे धाव, तातडीने दुरुस्तीची मागणी
कासा, ता. २५ (बातमीदार) ः डहाणू तालुक्यातील वधना-निकणे परिसरातील सुसरी नदीवरील पुलाचे सिमेंट, माती, दगड मुसळधार पावसामुळे वाहून गेले आहे. यामुळे पुलावर खड्डे पडले असून त्यावरून प्रवास करणे धोक्याचे झाले आहे. त्यामुळे ग्रामस्थांना मोठ्या गैरसोयीचा सामना करावा लागत आहे. या परिस्थितीमुळे ग्रामस्थांनी जिल्हाधिकाऱ्यांकडे धाव घेत दुरुस्तीचे निवेदन दिले.
सुसरी नदीवरील पुलाचे सिमेंट वाहून गेल्याने मार्ग बंद झाल्याने शाळकरी विद्यार्थी, रुग्ण आणि शेतकऱ्यांना मोठ्या अडचणींना सामोरे जावे लागत आहे. आपत्कालीन परिस्थितीत रुग्णांना दवाखान्यात पोहोचवणे अशक्य झाले आहे. तर, शेतमालाची वाहतूक ठप्प झाल्याने ग्रामस्थांवर आर्थिक संकट ओढावले आहे.

आंदोलनाचा इशारा
ग्रामस्थांनी शासनाने तातडीने पूल दुरुस्त करून रस्ता सुरू करावा, अन्यथा मोठ्या आंदोलनाचा इशारा दिला आहे. आदिवासी पारंपरिक कलाकार संस्थेचे अध्यक्ष वेशू गुहे, पेसा अध्यक्ष दिलीप घोषे, यतीन नम, नकुल घाटाळ, योगेश तमोरे यांनी जिल्हाधिकाऱ्यांना निवेदन देऊन तातडीच्या कारवाईची मागणी केली.

लवकरच दुरुस्ती
निवेदनानंतर दुसऱ्याच दिवशी संबंधित विभागाचे अभियंते घटनास्थळी दाखल होऊन पुलाची पाहणी केली असून, लवकरच दुरुस्तीचे काम हाती घेण्याची शक्यता आहे.