ठाकुर्लीत नागरिकांनी बुजवले खड्डे
कल्याण, ता. २६ (बातमीदार) : गणेशोत्सव सुरू झाला तरीही शहरात काही ठिकाणच्या रस्त्यांवरील लहान-मोठे खड्डे अद्यापही बुजवले गेले नाहीत. त्यामुळे दुरुस्तीची वाट पाहून ठाकुर्ली चोळेगाव येथील वैतागलेल्या नागरिकांनी स्वतःच रस्त्यावर उतरून स्वखर्चातून रस्ते बुजवले आहेत. याबाबत नागरिकांनी महापालिका प्रशासनावर संताप व्यक्त केला आहे. मागील चार महिन्यांपासून सुरू असलेल्या सततच्या पावसाने शहरातील रस्त्यांची चाळण झाली आहे. गणेशोत्सवापूर्वी रस्त्यांवरील खड्डे बुजविण्याचे काम महापालिका प्रशासनाने हाती घेतले असले तरी प्रशासनाला सर्वच ठिकाणी पोहोचता आले नसल्याने काही ठिकाणी खड्डेमय परिस्थिती आहे. त्यामुळे करदात्या नागरिकांना कर भरल्यानंतरही स्वतःच्याच खर्चातून सार्वजनिक रस्त्यांवरील खड्डे बुजविण्याची नामुष्की ओढवली असून, प्रशासकीय यंत्रणा काही ठिकाणी अपयशी ठरल्याच्या भावना नागरिकांकडून व्यक्त केल्या जात आहेत.