गणेशोत्सवात भिवंडी बायपासवर अवजड वाहतुकीला बंदी घाला
माजी केंद्रीय राज्यमंत्री कपिल पाटील यांची मागणी
भिवंडी, ता. २६ (बातमीदार) : भिवंडी शहर व ग्रामीण तालुक्याला वाहतुकीच्या कोंडीने विळखा घातला आहे. भिवंडीतील हजारो नागरिकांना व गणेश भक्तांना दिलासा देण्यासाठी ठाणे-भिवंडी बायपासवरील जड-अवजड वाहनांच्या वाहतुकीला सण व उत्सवांच्या काळात सकाळी नऊ ते रात्री नऊपर्यंत बंदी घालावी, अशी मागणी माजी केंद्रीय राज्यमंत्री कपिल पाटील यांनी मंगळवारी (ता. २६) केली.
भिवंडी तालुक्याला भेडसावणाऱ्या वाहतूक कोंडीच्या प्रश्नावर जिल्हाधिकारी कार्यालयात बैठक झाली. जिल्हाधिकारी श्रीकृष्णनाथ पांचाळ यांच्या उपस्थितीत झालेल्या या बैठकीला कपिल पाटील यांची उपस्थिती होती. भिवंडी तालुक्यातील गोदामांमधून देशभरात माल पाठवला जातो. गेल्या तीन महिन्यांतील भीषण वाहतूक कोंडीमुळे व्यावसायिकांबरोबरच सामान्य जनतेला फटका बसला आहे. विद्यार्थी, नोकरदार आणि नागरिकांचे हाल होत आहेत. या पार्श्वभूमीवर जेएनपीटीहून अहमदाबादकडे जाणारी सर्व जड अवजड वाहनांची वाहतूक किमान सण-उत्सवांच्या काळात बंद करावी, अशी मागणी कपिल पाटील यांनी केली.