अमली पदार्थांपासून दूर राहण्याचे तरुणांना आवाहन
जुईनगर, ता. १ (बातमीदार) : नेरूळ परिसर हळूहळू अमली पदार्थ आणि गांजाचा अड्डा बनत असून, यापासून विद्यार्थी आणि युवकांना दूर राहण्याचे आवाहन करण्यात आले आहे. याबाबत गणरायाला प्रार्थना करणारा बॅनर नेरूळ परिसरात सगळ्यांचे लक्ष वेधून घेत आहे. या माध्यमातून नशामुक्त नेरूळ अभियानाचा श्रीगणेशा यंदाच्या गौरी-गणपतीपासून सुरू करीत असल्याचाही मजकूर प्रदर्शित करण्यात आला आहे. परिसरात गांज्याची विक्री वाढली असून, त्याचे सेवन करण्याच्या प्रमाणात वाढ झाली आहे. त्यामुळे असे प्रकार दिसताच नेरूळ पोलिस ठाण्याच्या मदत क्रमांकावर संपर्क साधण्याचे आवाहन करण्यात आले आहे. नेरूळ विभागात गांजाविक्री आणि त्याचे सेवन मोठ्या प्रमाणात वाढले आहे. त्यामुळे नेरूळ गावातील माजी नगरसेवक गिरीश म्हात्रे आणि समाजसेवक देवनाथ म्हात्रे यांनी याबाबत बॅनरमार्फत जनजागृती सुरू केली आहे.