कार रॅलीतून दिबांना मानवंदना
भिवंडीतून जासईकडे रविवारी होणार मार्गस्थ
तुर्भे, ता. ११ (बातमीदार) : भिवंडी लोकसभा मतदारसंघाचे खासदार सुरेश म्हात्रे यांनी लोकनेते दिबा पाटील जन्मशताब्दी वर्षाचे औचित्य साधत भिवंडी ते जासईमार्गे मानवंदना कारची रॅली काढण्याचा निर्णय घेतला आहे. या रॅलीच्या माध्यमातून नवी मुंबई आंतरराष्ट्रीय विमानतळाला दिबांचे नाव देण्याच्या मागणीकडे केंद्र तसेच राज्य सरकारचे लक्ष वेधण्यात येणार आहे.
नवी मुंबईतून जासईकडे मार्गस्थ होणाऱ्या रॅलीच्या नियोजनासाठी मंगळवारी (ता. ९) शेतकरी समाजमंदिर कोपरखैरणे येथे नियोजन बैठक झाली. या बैठकीत नवी मुंबईतील २८ गावांतून शंभरहून अधिक कार्यकर्त्यांनी सहभाग नोंदवला. या वेळी रॅलीचे स्वागत, नियोजन यशस्वी करण्याचा निर्धार करण्यात आला. तसेच रॅलीच्या मार्गावर असणाऱ्या गाव-नाक्यांवर रॅलीचे स्वागत करण्याची भावना ग्रामस्थांनी व्यक्त केली आहे. अशावेळी रॅलीचे स्वागत, अभिवादन आणि वाहन नियोजनाबाबत बैठकीत चर्चा करण्यात आली.