कल्याण रेल्वेस्थानक परिसरातून सात बांगलादेशी ताब्यात
कल्याण, ता. ११ (बातमीदार) : कल्याण रेल्वेस्थानक परिसरात पेट्रोलिंग करत असताना पोलिसांना सहा संशयास्पद महिला आढळल्या. चौकशीअंती त्या सर्व महिला बांग्लादेशातील असल्याचे निष्पन्न झाले असून, त्यांच्या जवळ भारतामध्ये वास्तव्यासाठी कोणतेही वैध कागदपत्र आढळले नाहीत. पोलिसांनी त्यांच्या मोबाईलची तपासणी केली असता, ईमो अ‍ॅपद्वारे +८८ या बांगलादेशी सीरिजच्या क्रमांकांवर चॅटिंग आणि कॉलिंग केल्याचे आढळून आले. काही महिलांकडे बांग्लादेशातील जन्म प्रमाणपत्रे आणि नॅशनल आयडी कार्ड आढळून आली. तसेच बुधवारी (ता. १०) सकाळी ११ वाजता कल्याण रेल्वेस्थानक परिसरात एक अनोळखी पुरुष फिरताना आढळला. त्याच्याकडेही बांगलादेशातील जन्म दाखला आणि ओळखपत्र सापडले. प्राथमिक चौकशीत या सर्वांनी बांगलादेशातून बेकायदेशीररीत्या भारतात प्रवेश केल्याचे कबूल केले. ते रेल्वेने मुंबईत आले होते. सदर सहा महिला व एक पुरुष यांच्याविरोधात पुढील कायदेशीर कारवाई सुरू असून, ही माहिती सहाय्यक पोलिस आयुक्त कल्याणजी घेटे यांनी दिली. ही कारवाई बेकायदेशीर स्थलांतराच्या संदर्भात गंभीर बाब मानली जात असून, या घटनेमुळे सुरक्षेच्या दृष्टीने चिंता व्यक्त केली जात आहे.