शिवनेरी बसचालकाला मारहाण
नवी मुंबई, ता. १२ (वार्ताहर) : शिवनेरी बसचालकाने दुचाकीला पुढे जाण्यासाठी रस्ता न दिल्याने संतप्त झालेल्या दुचाकीस्वाराने या बसचालकाला मारहाण करून बसचा रिमोट घेऊन पलायन केल्याची घटना गुरुवारी (ता. ११) सकाळी ऐरोली येथे घडली. रबाळे पोलिसांनी या प्रकरणातील दुचाकीस्वाराविरोधात चोरीचा गुन्हा दाखल करून त्याचा शोध सुरू केला आहे.
आकोबा गाढवे (वय ३७) ई शिवनेरी बसचालकाचे नाव असून, ते महामंडळाच्या स्वारगेट बस डेपोमध्ये चालक म्हणून कार्यरत आहेत. गुरुवारी सकाळी साडेपाच वाजता स्वारगेट येथून शिवनेरी बसमधून प्रवासी घेऊन ते ठाणे येथे जात होते. या वेळी ते मुलुंडच्या दिशेने जाण्यासाठी ऐरोलीतील दिवा गाव सर्कल येथे आला असता आरोपी दुचाकीस्वाराने गाढवे यांना पुढे जाण्यासाठी हॉर्न दिला, मात्र गाढवे यांना उजव्या बाजूला बस घेण्यासाठी जागा नव्हती, मात्र संतापलेल्या दुचाकीस्वाराने शिवनेरी बस अडवून बसचालक गाढवे यांना शिवीगाळ करून मारहाण केली. यामध्ये त्याने बस चालू बंद करण्यासाठी असलेले रिमोट घेऊन घटनास्थळावरून पळ काढला. या प्रकारानंतर आकोबा गाढवे यांनी याबाबतची माहिती बस डेपोमध्ये दिल्यानंतर रबाळे पोलिस ठाण्यात तक्रार दाखल केली.