श्री गजानन विद्यालयात विज्ञान प्रदर्शनाला प्रतिसाद
कल्याण, ता. १२ (वार्ताहर) : विज्ञान म्हणजे कुतूहल, यातूनच प्रश्न निर्माण होतात आणि विविध शोध लागतात. यासाठी मुलांनी मोबाईलचा वापर कमी करून पुस्तके वाचन करावे आणि योग्य आहारातून शरीर मन सुदृढ ठेवावे, असा मोलाचा सल्ला डॉ. सुरेखा इटकर यांनी विद्यार्थ्यांना दिला. कल्याणमधील श्री गजानन विद्यालयात आयोजित विज्ञान प्रदर्शनात प्रमुख पाहुणे म्हणून त्या बोलत होत्या.
श्री गजानन विद्याप्रसारक मंडळ संस्थेचे संस्थापक सदस्य प्रभाकर भालेराव यांच्या जयंतीनिमित्त दरवर्षी श्री गजानन विद्यालय येथे विविध उपक्रमांचे आयोजन करण्यात येते. यंदा ही शाळेत १० सप्टेंबर रोजी विज्ञान प्रदर्शन आयोजित केले होते. या कार्यक्रमाला डॉ. सुरेख इटकर प्रमुख अतिथी म्हणून उपस्थित होत्या. संस्थेचे सदस्य सुश्रुत भालेराव, आस्मा क्रिएशनच्या अश्विनी भालेराव हे यावेळी उपस्थित होते. सुप्रिया जोशी आणि मंजुळे हे परीक्षक म्हणून उपस्थित होते.
इयत्ता आठवी, नववीच्या विद्यार्थिनींनी सुमधूर विज्ञान गीत सादर केले. यानंतर प्रमुख अतिथी सुरेखा इटकर, माध्यमिक विभागाच्या मुख्याध्यापिका कांचन भालेराव, प्राथमिक विभागाच्या मुख्याध्यापिका कल्पना पाटील, ज्येष्ठ शिक्षिका वंदना शिंदे आणि परीक्षक सुप्रिया जोशी, नीलम पाटणकर, राखी गंगुर्दे आणि मंजुळे यांनी सर्व विज्ञान प्रकल्पांना भेट देऊन विद्यार्थ्यांचे कौतुक केले आणि त्यांना मार्गदर्शन केले.