आंबिवली येथील प्रस्तावित सिमेंट युनिटला मी कल्याणकरची हरकत
कल्याणच्या महाराष्ट्र प्रदूषण नियत्रंण मंडळात नोंदवली हरकत
कल्याण, ता. १२ (वार्ताहर) : आंबिवली येथील प्रस्तावित सिमेंट ग्राइडिंग युनिटबाबत मी कल्याणकर सामाजिक संस्थेने हरकत घेतली आहे. संस्थेचे अध्यक्ष तथा पालिकेचे माजी नगरसेवक नितीन निकम यांनी याबाबत महाराष्ट्र प्रदूषण नियत्रंण मंडळात उपप्रादेशिक अधिकारी यांच्याकडे हरकत नोंदवली आहे.
उल्हास नदीमधील पाणी इतके प्रदूषित आहे की ते पिण्यायोग्य नाही, असा प्रदूषण नियत्रंण मंडळाचा अहवाल आहे. तरीही कल्याण-डोंबिवली पालिका क्षेत्रामधील मौजे मोहने, अटाळी व आंबिवली या ठिकाणी पूर्वीच्या एनआरसी कंपनीच्या जागेमध्ये आंबिवली सिमेंट ग्राइडिंग यूनिट सुरु करण्यासाठी प्रदूषण नियंत्रण कार्यालयाकडे अर्ज आला आहे.
याबाबत शनिवारी (ता. १३) जनसुनावाणीचे आयोजन केले आहे. तर, लेखी स्वरुपात सूचना देखील मागविल्या आहेत. या प्रस्तावित प्रकल्पाला मी कल्याणकर सामाजिक संस्थेने आक्षेप घेतला असून यामध्ये जनसुनावणीबाबत स्थानिकांना पूर्णपणे कल्पना न देणे, या प्रकल्पापासून उल्हास नदी व काळू नदी अगदी जवळ आहे. यासह इतर आक्षेपांचा विचार करुन प्रस्तावित प्रकल्पाला ईसी देवू नये, अशी मागणी संस्थेने केली आहे.