जिल्ह्यात महिलांसाठी स्वस्थ नारी, सशक्त परिवार अभियान
ठाणे, ता. १३ (बातमीदार) : ठाणे जिल्ह्यात बुधवार (ता. १७) सप्टेंबर ते गुरुवार (ता. २) ऑक्टोबर या कालावधीत नारी ही संस्कृतीची जननी, नारी हीच जीवनाची शक्ती या उपक्रमांतर्गत महत्त्वाची आरोग्य चळवळ सुरू होत आहे. आरोग्य व कुटुंबकल्याण मंत्रालयाच्या स्वस्थ नारी, सशक्त परिवार अभियानाच्या माध्यमातून स्त्रियांच्या आरोग्याला एक नवा आयाम मिळणार आहे.
ठाणे जिल्हा शासकीय रुग्णालयात या अभियानाची सुरुवात आरोग्य शिबिराने होणार असून, गुरुवार (ता. २) ऑक्टोबर गांधी जयंतीपर्यंत हा उपक्रम चालणार आहे. जिल्हा शल्यचिकित्सक डॉ. कैलास पवार आणि अतिरिक्तज जिल्हा शल्यचिकित्सक डॉ. संगीता माकोडे यांच्या मार्गदर्शनाखाली होणाऱ्या आरोग्य शिबिरात स्त्रीरोग, बालरोग, नेत्र, दंत, अस्थिरोग, त्वचारोग, शल्यचिकित्सा असे सर्व तज्ज्ञ एकाच छताखाली सेवा देतील. मोफत आरोग्य तपासण्या, तज्ज्ञ मार्गदर्शन आणि महिलांसाठी खास सेवा या माध्यमातून ठाणे जिल्ह्यातील हजारो महिलांना आरोग्याचा नवा आत्मविश्वास मिळणार असल्याची माहिती निवासी वैद्यकीय अधिकारी डॉ. मृणाली राहुड यांनी दिली.
हा उपक्रम फक्त आरोग्य तपासणी नाही, तर महिलांच्या आत्मसन्मानाचा, विश्वासाचा आणि आरोग्यदायी भविष्यासाठीच्या आशेचा दीपस्तंभ आहे. आयुष्मान कार्ड, वय वंदना योजना, रक्तदान शिबिर आणि आंगणवाड्यांच्या उपक्रमांशी संलग्न सेवा महिलांना नव्या शक्तीची जाणीव करून देतील, असा विश्वास जिल्हा शल्यचिकित्सक डॉ. कैलास पवार यांनी व्यक्त केला.

चौकट
विशेष सत्रांचे आयोजन करणार
रक्तदाब, मधुमेह, क्षयरोग, अ‍ॅनिमिया, सिकल सेल अशा गंभीर आजारांची तपासणी, स्तन व गर्भाशयाच्या कर्करोगाची स्क्रीनिंग, गर्भवतींसाठी तपासण्या, लसीकरण आणि पोषण आहारविषयक मार्गदर्शन याचा थेट लाभ महिलांना मिळेल. इतकेच नव्हे तर मानसिक आरोग्य, स्वच्छता आणि पोषण यावर विशेष सत्रेही आयोजित करण्यात येणार आहेत.