लुटमारी करणारे त्रिकुट गजाआड
पनवेलच्या गुन्हे शाखेची कळंबोलीत कारवाई
पनवेल, ता.१८(वार्ताहर): सिमेंट बल्कर चालकाला वस्तऱ्याचा धाक दाखवून मोबाईल फोन लुटणाऱ्या त्रिकुटाला गुन्हे शाखा कक्ष-३, पनवेलच्या पथकाने अटक केली आहे. खांदेश्वरच्या हद्दीतही फसवणुकीच्या गुन्ह्यात सहभाग असल्याचे तपासात समोर आले आहे.
पनवेलमधील विचुंबे, विहीघर भागात राहणारे प्रथमेश तरे (२४), समीर पेडणेकर (२६), साहिल खैरे (२३) या त्रिकुटाने १४ सप्टेंबर रोजी स्कुटीवरुन जाऊन कळंबोली सिग्नलजवळ सिमेंट बल्करला अडवले होते. त्यानंतर चालकाला वस्ताऱ्याचा धाक दाखवून पैशांची मागणी केली होती. या त्रिकुटाने चालकाचा महागडा फोन घेऊन पलायन केले. याप्रकरणी कळंबोली पोलिस ठाण्यात जबरी चोरीचा गुन्हा दाखल झाल्यानंतर गुन्हे शाखा कक्ष-३ च्या पथकाने समांतर तपास सुरु केला होता. पथकाने तांत्रिक तपास, सीसीटीव्ही फुटेज, गुप्त माहिती व मानवी कौशल्याचा वापर तिन्ही आरोपींना १७ सप्टेंबर रोजी दुपारी अटक केली. या तिघांना न्यायालयात हजर केले असता, त्यांना २० सफ्टेंबर पर्यंत पोलिस कोठडी सुनावली आहे. तसेच कारवाईसाठी कळंबोली पोलिसांच्या ताब्यात देण्यात आले आहे.
-------------------------------------
आरोपींची गुन्हेगारी पार्श्वभूमी
अटक केलेले तिघे सराईत गुन्हेगार असून कळंबोली, खांदेश्वर पोलिस ठाण्याच्या हद्दीतील दोन गुन्हे उघडकीस आले आहेत. यातील अटक आरोपी समीर पेडणेकर विरोधात काळाचौकी पोलिस ठाण्यात ६ तर आझाद मैदान पोलिस ठाण्यात एक असे ७ वेगवेगळ्या प्रकारचे गुन्हे दाखल आहेत. तर प्रथमेश तरे विरोधात वडाळा पोलिस ठाण्याच्या हद्दीत ४ गंभीर स्वरुपाचे गुन्हे दाखल आहेत.