अज्ञात वाहनाच्या धडकेत तरुणाचा मृत्यू
भिवंडी, ता. १९ (वार्ताहर) : मानकोली नाका परिसरात एका अज्ञात ट्रकने धडक दिल्याने २५ वर्षीय तरुणाचा जागीच मृत्यू झाल्याची घटना गुरुवारी (ता. १८) रात्री घडली. मोहम्मद काशीम अब तालीब शेख असे या मृत तरुणाचे नाव आहे. याप्रकरणी अज्ञात ट्रकचालकाच्या विरोधात नारपोली पोलिस ठाण्यात गुन्हा दाखल करण्यात आला आहे. अपघातानंतर ट्रकचालक घटनास्थळावरून फरार झाला आहे.
काशीम हा रात्री ११ वाजताच्या सुमारास कामावरून पायी घरी परतत होता. त्याचवेळी एका भरधाव ट्रकने त्याला ओव्हरटेक करताना जोरदार धडक दिली. या धडकेत त्याच्या डोक्याला गंभीर दुखापत झाली आणि अधिक रक्तस्राव झाल्याने त्याचा जागीच मृत्यू झाला. या घटनेची माहिती मिळताच नारपोली पोलिसांनी तत्काळ घटनास्थळी धाव घेतली आणि मृतदेह शवविच्छेदनासाठी इंदिरा गांधी उपजिल्हा रुग्णालयात पाठवला. मृत तरुणाचा मोठा भाऊ आसिफ यांच्या तक्रारीवरून नारपोली पोलिस ठाण्यात अज्ञात चालकाविरुद्ध गुन्हा दाखल करण्यात आला आहे. पोलिस परिसरातील सीसीटीव्ही फुटेजच्या आधारे फरार चालकाचा शोध घेत आहेत.