संरक्षक भिंत कोसळून वाहनांचे नुकसान
कल्याण, ता. १९ (वार्ताहर) : मोहने येथील विकास कॉलनी परिसरात आज पहाटे एनआरसी कंपनीची (सध्या अदाणी समूहाच्या मालकीची) सुमारे ६० ते ७० फूट लांबीची संरक्षक भिंत कोसळली. या दुर्घटनेत पाच ते सहा रिक्षा, चार दुचाकी आणि एक चारचाकी असे एकूण आठ ते १० वाहनांचे मोठे नुकसान झाले आहे.
ही घटना पहाटे घडल्याने कोणतीही जीवितहानी झाली नाही; मात्र नागरिकांमध्ये भीतीचे वातावरण निर्माण झाले आहे. नागरिकांनी सांगितले की, ही संरक्षक भिंत सुमारे ५० ते ६० वर्षांपासून जुनी असून, ती जीर्ण झाली आहे. याआधीही अशा घटना घडल्या आहेत, तरीही भिंतीचे स्ट्रक्चरल ऑडिट केले जात नाही. या घटनेनंतर नुकसानग्रस्त रिक्षाचालक आणि इतर वाहनमालकांनी तातडीने नुकसानभरपाई देण्याची मागणी केली आहे.