निरक्षरांना साक्षर होण्याची पुन्हा संधी
नवभारत साक्षरता कार्यक्रमांतर्गत परीक्षा
कल्याण, ता. २० (वार्ताहर) : केंद्र सरकार पुरस्कृत नवभारत साक्षरता कार्यक्रमांतर्गत राज्य शालेय शिक्षण विभाग, योजना कार्यालय पुणे यांच्यामार्फत रविवारी (ता. २१) विशेष साक्षरता परीक्षा आयोजित करण्यात येत आहे. ही परीक्षा त्यांच्यासाठी आहे, जे २०२३-२४ व २०२४-२५ या शैक्षणिक वर्षांमध्ये परीक्षेला अनुपस्थित राहिले किंवा अपयशी ठरले होते. अशा निरक्षर व्यक्तींना साक्षर होण्याची दुसरी संधी या परीक्षेद्वारे दिली जात आहे. या पार्श्वभूमीवर कल्याण-डोंबिवली महानगरपालिकेच्या शिक्षण विभागामार्फत तयारीचा आढावा घेण्यासाठी सर्व सीआरसी प्रमुखांची विशेष बैठक घेण्यात आली. या बैठकीत परीक्षेचे स्वरूप, तयारी, केंद्रव्यवस्था याबाबत सविस्तर मार्गदर्शन करण्यात आले.

महापालिकेच्या हद्दीत एकूण ४४ परीक्षा केंद्रे निश्चित केली असून, १५३ महिला व ४५ पुरुष असे एकूण १९८ निरक्षर परीक्षार्थी या परीक्षेत सहभागी होणार आहेत. प्रशासनाधिकारी भारत बोरनारे आणि शिक्षणाधिकारी विजय सरकटे यांनी दिलेल्या माहितीनुसार, परीक्षेचे सुरळीत आयोजन व्हावे, यासाठी सर्व केंद्रप्रमुख व परीक्षा केंद्र संचालकांना आवश्यक सूचना देण्यात आल्या आहेत. ही परीक्षा फक्त एक शैक्षणिक उपक्रम नसून, नवीन संधीची दारे खुली करणारा एक सशक्त पाऊल आहे. निरक्षरतेमुळे मागे राहिलेल्या व्यक्तींना साक्षरतेचा आत्मविश्वास मिळावा आणि त्यांचं जीवनमान उंचवावे, हा या उपक्रमामागील मुख्य उद्देश आहे.