पुराच्या पाण्यात शेतकऱ्याचा बुडून मृत्यू

कासा, ता. २९ (बातमीदार) : डहाणू तालुक्यातील कळमदेवी परिसरातील रायपूर येथील शेतकरी सदानंद देऊ भुरभुरा (वय ५५) यांचा पुराच्या पाण्यात बुडून मृत्यू झाल्याची घटना सोमवारी सकाळी घडली.
मिळालेल्या माहितीनुसार, सदानंद भुरभुरा सोमवारी सकाळी शेतीची पाहणी करून घरी परतत होते. त्या वेळी मुसळधार पावसामुळे नदीला प्रचंड पूर आला होता. नदी ओलांडण्याच्या प्रयत्नात त्यांचा पाय घसरला व ते पाण्याच्या प्रवाहात वाहून गेले. प्रशासनाकडून त्यांचा शोध सुरू होता. अखेर मंगळवारी (ता. २९) सकाळी कळमदेवी येथील शिलोंडा ग्रामपंचायत हद्दीत नदीकाठी त्यांचा मृतदेह आढळून आला. मृतदेह तातडीने कासा उपजिल्हा रुग्णालयात शवविच्छेदनासाठी पाठविण्यात आला आहे. या घटनेचा पंचनामा करण्यात आला असून, शासनाच्या नियमानुसार संबंधित कुटुंबाला नुकसानभरपाई मिळावी यासाठी प्रक्रिया सुरू करण्यात येत असल्याची माहिती स्थानिक प्रशासनाकडून देण्यात आली आहे.