ठाण्यातील सेंट्रम बिझनेसच्या दुसऱ्या मजल्याला आग
ठाणे, ता. २९ ः वागळे इस्टेट परिसरातील सेंट्रम बिझनेस स्क्वेअरच्या ‘ए’ विंगमधील दुसऱ्या मजल्यावरील मे. निखिदीप प्लॅस्टिकर्स प्रा. लिमिटेडचे कार्यालयाला आग लागल्याची घटना सोमवारी (ता. २९) सकाळी ११ वाजता घडली. या आगीची माहिती मिळताच अग्निशमन दलाने घटनास्थळी धाव घेत दोन तासांनी आगीवर नियंत्रण मिळवले. या आगीत कंपनीचे कार्यालय संपूर्णपणे जळून खाक झाले असून ही आग लागल्याचे लक्षात येताच, कार्यालयामधील दोन महिला तत्काळ बाहेर पडल्याने त्या दोघी बचावल्याची माहिती ठाणे महापालिका आपत्ती व्यवस्थापन अधिकारी यासिन तडवी यांनी दिली. दरम्यान, ही आग कार्यालयातील वातानुकूलित यंत्रातील सर्किटमध्ये स्पार्क होऊन लागल्याची प्राथमिक माहिती पुढे येत आहे.