कोकण मंडळाच्या लाॅटरची सोडत ११ ऑक्टोबरला
म्हाडाकडून सुधारित वेळापत्रक जाहीर

सकाळ वृत्तसेवा
मुंबई, ता. ३० : म्हाडाच्या कोकण मंडळाने ५,३५४ सदनिका आणि ७७ भूखंडांच्या विक्रीसाठी जाहीर केलेल्या लाॅटरीची सोडत आता ११ ऑक्टोबरला ठाणे येथील डॉ. काशीनाथ घाणेकर नाट्यगृहात काढली जाणार आहे. याआधीच्या वेळापत्रकानुसार ९ ऑक्टोबरला लाॅटरीची सोडत काढण्याचे नियोजन होते; मात्र म्हाडाने लाॅटरीच्या वेळापत्रकात बदल करीत सुधारित वेळापत्रक जाहीर केले आहे. दरम्यान, कोकण मंडळाच्या लाॅटरीला भरघोस प्रतिसाद मिळाला असून, एक लाख ८४ हजार ९९४ अर्ज प्राप्त झाले आहेत. त्यापैकी एक लाख ५८ हजार ४२४ जणांनी अनामत रक्कम भरून आपला अर्ज अंतिम केला आहे. नवीन वेळापत्रकानुसार सोडतीसाठी स्वीकृत अर्जांची प्रारूप यादी १ ऑक्टोबर रोजी सायंकाळी ६ वाजता म्हाडाच्या https://housing.mhada.gov.in या अधिकृत संकेतस्थळावर प्रसिद्ध केली जाणार आहे. ३ ऑक्टोबर रोजी रोजी सायंकाळी ६ वाजेपर्यंत अर्जदारांना प्रारूप यादी प्रसिद्ध झाल्यापासून ऑनलाइन दावे व हरकती नोंदविता येणार आहेत. सोडतीसाठी पात्र ठरलेल्या अर्जदारांची अंतिम यादी ९ ऑक्टोबरला सायंकाळी ६ वाजता म्हाडाच्या संकेतस्थळावर प्रसिद्ध केली जाणार आहे, तर ११ ऑक्टोबरला लाॅटरीची सोडत काढली जाणार आहे.