राष्ट्रवादीचे पदाधिकारी शिंदे गटात दाखल
आव्हाडांना पुन्हा धक्का; उपमुख्यमंत्री एकनाथ शिंदे यांच्या उपस्थितीत पक्षप्रवेश
सकाळ वृत्तसेवा
ठाणे, ता. ३० : राष्ट्रवादी काँग्रेसचे (शरद पवार गट) आमदार डॉ. जितेंद्र आव्हाड यांना त्यांच्याच जिल्ह्यात पुन्हा एकदा राजकीय धक्का बसला आहे. माजी नगरसेवकांनंतर आता राष्ट्रवादीच्या युवक अध्यक्षासह इतर पदाधिकाऱ्यांनी शिवसेनेत (शिंदे गट) प्रवेश केला आहे.
उपमुख्यमंत्री एकनाथ शिंदे यांच्या उपस्थितीत मंगळवारी (ता. ३०) ठाण्यात हा पक्षप्रवेश झाला. राष्ट्रवादी काँग्रेस शरद पवार पक्षाचे विक्रम खामकर, प्रफुल्ल कांबळे, पीटर डिसोजा, विलास पाटील, अभिषेक कुसाळकर, सुनील कुराडे यांच्यासह अनेक कार्यकर्त्यांनी ठाण्यातील आनंदाश्रम येथे हाती भगवा घेऊन शिवसेनेत प्रवेश केला.
या वेळी उपमुख्यमंत्री शिंदे यांनी या सर्वांचे स्वागत करीत या प्रवेशामुळे ठाणे जिल्ह्यातील शिवसेना अधिक भक्कम झाल्याचे सांगितले. ‘जे प्रामाणिकपणे काम करतात तेच पुढे जातात. आमच्या पक्षात वशिलेबाजीला स्थान नाही,’ असे सांगत त्यांनी कार्यकर्त्यांना पक्षासाठी झोकून देत काम करण्याचे आवाहन केले.
या वेळी खासदार नरेश म्हस्के, शिवसेना सचिव राम रेपाळे, ठाणे लोकसभा संपर्कप्रमुख मनोज शिंदे, माजी नगरसेवक योगेश जानकर आणि शिवसेनेचे ठाण्यातील सर्व प्रमुख पदाधिकारी आणि कार्यकर्ते मोठ्या संख्येने उपस्थित होते.