विक्रमगड, ता. २ (बातमीदार) : कंचाड ते पाचमाड या मुख्य मार्गावर कुंर्झे-ब्राम्हणगाव या गावांमधून वाहत असलेल्या देहर्जे नदीवरील पूल लहान व अरुंद आहे. पावसाळ्यातील अनेक दिवस हा पूल पाण्याखाली जातो. अनेकदा तीन ते चार दिवस या मार्गावरील वाहतूक पूर्णपणे बंद होते. अनेक वर्षांपासून नागरिक, तसेच विद्यार्थ्यांची होणारी हेळसांड सरकारच्या लक्षात घेऊन या जागी नवीन पूल उभारला जात नाही, याबाबत संताप व्यक्त केला जात आहे.

कंचाड ते पाचमाड या मार्गावर अनेक गाव-पाडे असून हा मार्ग येथील लोकांच्या प्रवासात महत्त्वाची भूमिका बजावतो. कुंर्झे-ब्राम्हणगाव या गावांच्या सीमेवरून देहर्जे ही नदी वाहत असून या नदीवर एक पूल उंचीने लहान आहे. ज्यावरून अगदी किरकोळ पावसानेदेखील पाणी येऊन वाहतूक पूर्ण ठप्प होते. या परिसरातील कुर्झे, कडीपाडा यासह अनेक गावांतील विद्यार्थ्यांना शाळेत जाण्याचा प्रश्न उभा राहत असून त्यांचे शैक्षणिक नुकसान होते. याशिवाय नोकरदार व अन्य प्रवाशांना वाहतुकीच्या समस्यांना सामोरे जावे लागते. पावसाळ्यात लोकांना विक्रमगडमार्गे प्रवास करावा लागतो. अनेकदा तोही मार्ग ठप्प होतो.

या परिसरातील वाहतूक समस्या लक्षात घेऊन तत्काळ सरकारने या ठिकाणी नवीन पुलाची उभारणी करावी, अशी लोकांनी मागणी केली आहे. येथील पुलाच्या उभारणीसाठी सार्वजनिक बांधकाम विभागाने प्रयत्न करायला हवेत, अशी मागणी ग्रामस्थांची आहे.

मागील अनेक वर्षांपासून नवीन पुलाची मागणी आहे. हा अनेक गावांना जोडणारा प्रमुख रस्ता आहे; मात्र पावसाळ्यात थोडा पूर आला तरी हा रस्ता बंद होऊन आम्हाला घरीच राहावे लागते. त्यामुळे प्रशासन, लोकप्रतिनिधींनी तत्काळ लक्ष देऊन येथे नवीन पूल उभारून द्यावा.
- कल्पेश शेलार, ग्रामस्थ, कुंर्झे