दुचाकी चालकाने केला सिलेंडर लंपास
कल्याण, ता.६ (बातमीदार) : पुना लिंक रोडवरील काटेमानवली परिसरात सिलेंडर चोरीची घटना नुकतीच घडली आहे. दुचाकीवर आलेल्या एका व्यक्तीने दुचाकीवरील सिलेंडर चोरून नेल्याचे सीसीटीव्ही फुटेजमध्ये स्पष्टपणे दिसून येते. संबंधित व्हिडिओ सध्या समाज माध्यमांवर व्हायरल होत आहे. काटेमानवली परिसरात एका दुकानाबाहेर सिलेंडरची गाडी उभी होती. त्याचदरम्यान, स्कुटीवर आलेल्या एका व्यक्तीने गाडीमधील सिलेंडर उचलले आणि स्कुटीवर टाकून लगेच पळ काढला. अशाप्रकारे उघडपणे चोरी होत असल्याने परिसरातील नागरिकांमध्ये भीतीचे वातावरण पसरले आहे. पोलिसांनी तातडीने कारवाई करून दोषींना अटक करण्याची मागणी नागरिकांनी केली आहे. या घटनेमुळे परिसरातील सुरक्षा व्यवस्थेबाबत प्रश्नचिन्ह उपस्थित झाले आहे.