धारावीतील पादचारी पूल समस्यांच्या गर्तेत
धारावी, ता. ६ (बातमीदार) : धारावीतून माहीम स्थानकाकडे व माहीम पश्चिमेला जाण्यासाठी धारावी मुख्य रस्त्यावर असलेल्या पादचारी पुलावर गेल्‍या अनेक दिवसांपासून विविध समस्या निर्माण झाल्या आहेत. त्‍यामुळे प्रवासी व पादचाऱ्यांना त्रास सहन करावा लागत आहे.
पुलावर जागोजागी कचरा पडला आहे. तसेच काही लोक इथे झोपलेले असतात. अनेकदा विजेचे दिवे बंद असतात. अशा अनेक समस्‍यांमुळे स्थानिक रहिवासी संताप व्यक्त करत आहेत. धारावी मुख्य रस्त्यावरून माहीमच्या दिशेने जाण्यासाठी स्थानिकांना ६० फुटी संत कबीर मार्ग हा रस्ता ओलांडून जावे लागत होते. त्‍यामुळे अनेकदा अपघात होत होते. या समस्येतून मार्ग काढण्यासाठी सरकारने १२ वर्षांपूर्वी हा पादचारी पूल उभारला होता. मात्र, हा पादचारी पूल माहीम स्थानकाला जोडला गेला नव्हता. त्यामुळे स्थानकाकडे जाणारे प्रवासी पादचारी पुलाखालून रस्ता ओलांडून जात होते. पादचारी पूल स्थानकाला जोडला जावा, यासाठी अनेकदा आंदोलने झाली होती. त्याची दखल घेत राज्‍य सरकारने पादचारी पूल स्थानकाला जोडला. पूर्वी माहीम पश्चिमेला जाण्यासाठी पश्चिम रेल्वेवरील माहीम स्थानकाजवळ फाटक होते.