मथुरादास मार्गावर पहाटे कचऱ्याचे ढिगारे
प्रवाशांसह स्थानिक नागरिक हैराण
कांदिवली, ता. ६ (बातमीदार) ः कांदिवली पश्चिमेला मथुरादास मुख्य मार्ग भाजीगल्ली म्हणून प्रसिद्ध आहे. पालिकेने वारंवार कारवाई करूनदेखील या मार्गावर दुतर्फा भाजी, फळ आणि विविध सामान विक्रेते ठाण मांडून बसलेले असतात. रात्री व्यवसाय बंद केल्यानंतर सर्व व्यावसायिक रस्त्यावरच कचरा टाकतात.
सकाळीच रस्त्यावर कचऱ्याचे ढिगारे पसरलेले असल्याने त्याचा नाहक त्रास प्रवाशांसह स्थानिकांना होतो. विशेष म्हणजे रस्त्यावर टाकलेला कचरा पालिकेचे सफाई कर्मचारी साफ करतात.
कांदिवली पश्चिमेला मथुरादास मार्गावर दुतर्फा मोठ्या प्रमाणात भाजी, फळे, कपडे आणि इतर वस्तू विक्रेते ठाण मांडून बसले आहेत. अनधिकृत भाजी व फळविक्रेते आणि व्यावसायिक निर्माण होणारा कचरा रात्री व्यवसाय बंद केल्यानंतर रस्त्यावर टाकतात.
या मार्गावर महाविद्यालय, विधी महाविद्यालय, शाळा आणि मंदिरे आहेत. पहाटे या मार्गांवर जागोजागी पडलेला भाजीचा कचरा, प्लॅस्टिक आणि कचऱ्याचे ढिगारे यामुळे सकाळी कामावर जाणारे कर्मचारी, विद्यार्थी आणि जैन मंदिरात जाणाऱ्या भक्तांना दुर्गंधीचा सामना करावा लागत आहे. स्थानिकांनी वारंवार तक्रार करूनदेखील ठोस कारवाई करण्यात आलेली नाही.