दिघा येथील माता-बाल रुग्णालयाचे काम अंतिम टप्प्यात
नवीन वर्षात होणार सुरू ः दिघावांसीयाना मिळणार दिलाासा
वाशी, ता. ६ (बातमीदार) ः दिघा विभागातील पालिकेच्या ओस वन भूखंडावर माता-बाल रुग्णालयाचे काम अंतिम टप्प्यात आले आहे. ही इमारत पूर्णपणे तयार असून, अंतर्गत कामे सुरू आहेत. या वर्षाअखेरपर्यंत माता-बाल रुग्णालयाचे काम पूर्ण होईल आणि नवीन वर्षात हे रुग्णालय सुरू होणार असल्याचा विश्वास पालिकेचे कार्यकारी अभियंता संजय पाटील यांनी व्यक्त केला आहे. यामुळे दिघावांसीयांना आरोग्यसेवेचा दिलासा मिळणार आहे.
दिघा परिसर हा सर्वाधिक झोपटपट्टी परिसर म्हणून ओळखला जातो. याशिवाय, या परिसरात मध्यमवर्गीय आणि गरीब लोकवस्तीचा भागही मोठा आहे. या परिसरातील गर्भवती महिलांना उपचारासाठी, प्रसूतीसाठी ऐरोली येथील माता-बाल रुग्णालय किंवा कळवा किंवा वाशी येथील महापालिकेच्या रुग्णालयात जावे लागते. आर्थिक स्थिती कमकुवत असल्याने खासगी रुग्णालयांचा खर्च येथील महिलांना परवडणारा नसतो, मात्र ऐरोली रुग्णालय दिघ्यापासून दूर असल्याने अनेक वेळा गर्भवती महिलांना रुग्णालयात पोहोचेपर्यंत जीव मुठीत घेऊन जावे लागते.
दिघ्यातून ऐरोलीत जाण्यासाठी पहिल्यांदा ठाणे-बेलापूर मार्गावर यावे लागते आणि तिथून रिक्षा किंवा बस पकडून ऐरोलीत पोहोचता येते. यात वेळ आणि पैसे दोन्हीचा अपव्यय होत असतो. दिघा परिसराची लोकसंख्या पाहता या ठिकाणीच महिलांसाठी स्वतंत्र रुग्णालय उभारावे, अशी मागणी लोकप्रतिनिधीकडून करण्यात येत होती. त्यानुसार महापालिकेनेही या ठिकाणी रुग्णालय उभारण्याच्या हालचाली सुरू केल्या होत्या. त्यासाठी जागेची मोठी अडचण होती, मात्र त्यासाठी पाठपुरावा करून एमआयडीसीकडून ओसएस वन भूखंड मिळवण्यात महापालिकेला यश आले आहे. महापालिकेने या दिघा परिसरासाठी स्वतंत्र माता-बाल रुग्णालय उभारण्याचे काम सुरू केले. त्यानुसार माता-बाल रुग्णालयांची इमारत ही पूर्ण झाली असून, अंतर्गत कामे करण्याची प्रक्रिया सुरू आहे, तर साठेनगरपासून रुग्णालयाकडे जाण्यासाठी रस्तादेखील बनवण्यात आला असून, त्यांचेदेखील काम पूर्ण झाले आहे, अशी माहिती संजय पाटील यांनी दिली आहे.

दिघा येथे माता-बाल रुग्णालय उभारण्याचे काम हे सुरू असून, येत्या वर्षाअखेरपर्यंत पूर्ण होईल.
- संजय पाटील, कार्यकारी अभियंता