लाचखोर निलंबित उपायुक्त शंकर पाटोळे न्यायालयीन कोठडीत
आरोपींचा जामिनासाठी अर्ज
सकाळ वृत्तसेवा
ठाणे, ता. ६ : अनधिकृत बांधकाम हटविण्यासाठी घेतलेल्या लाचप्रकरणी अटकेत असलेले ठाणे महापालिकेचे निलंबित उपायुक्त शंकर पाटोळे, ओमकार गायकर आणि सुशांत सुर्वे या तिघांना ठाणे जिल्हा व अतिरिक्त सत्र न्यायाधीश एस. एस. शिंदे यांनी सोमवारी (ता. ६) न्यायालयीन कोठडी सुनावली आहे. याचदरम्यान त्या तिघांच्या वकिलाने जामिनासाठी अर्ज केला असून, त्याच्यावर बुधवारी (ता. ८) सुनावणी होणार आहे.
नौपाड्यातील गाळे हटविण्यासाठी मुंबईतील एका बांधकाम व्यावसायिकांकडून २५ लाखांची लाच स्वीकारताना पाटोळे आणि गायकर या दोघांना महापालिकेच्या ४३ व्या वर्धापनदिनी अटक करण्‍यात आली. आरोपींना दोन वेळा दोन दिवसांची पोलिस कोठडी सुनावण्यात आली होती. दरम्यान, तिसरा आरोपी सुशांत सुर्वे याला अटक करण्यात आल्यावर त्याला तीन दिवसांची पोलिस कोठडी सुनावली. सोमवारी तिघांची पोलिस कोठडी संपल्याने त्यांना एकत्रच ठाणे जिल्हा व अतिरिक्त सत्र न्यायालयाचे न्यायाधीश शिंदे यांच्या न्यायालयात हजर केले. या वेळी लाचलुचपत प्रतिबंधक विभागाकडून त्या तिघांना न्यायालयीन कोठडी मिळावी, अशी मागणी करण्यात आली. त्यानुसार न्या. शिंदे यांनी आरोपींची रवानगी न्यायालयीन कोठडी केली.

जामीन अर्जावर बुधवारी सुनावणी
आरोपींनी सोमवारी न्यायालयीन कोठडी मिळाल्यावर त्यांच्या वकिलांकडून त्यांना जामीन मिळावा, यासाठी ठाणे न्यायालयात जामीन अर्ज सादर करण्यात आला. याचदरम्यान न्या. शिंदे यांनी येत्या बुधवारी त्या अर्जावर सुनावणी होईल, असे स्पष्ट केले.