रद्द केलेल्या मद्य परवान्याची प्रत सादर करा!

मुंबई, ता. ६ ः मद्य परवाना रद्द केलेल्यासंदर्भात भारतीय महसूल सेवा (आयआरएस) अधिकारी समीर वानखेडे यांनी दाखल केलेल्या याचिकेची उच्च न्यायालयाने सोमवारी (ता. ६) दखल घेतली. याचिकेप्रकरणी महाराष्ट्र उत्पादन शुल्क विभागाच्या एका निरीक्षकाला नव्याने नोटीस बजावली. तसेच वानखेडे यांच्या वयाबाबत प्रश्न उपस्थित करून त्यांना रद्द केलेल्या परवान्याची प्रत सादर करण्याचे आदेशही न्यायालयाने दिले. 
हा परवाना वानखेडे यांच्या आईच्या नावे काढला होता. अल्पवयीन असूनही वानखेडेंचे नाव त्यात नंतर जोडले होते. त्यामुळे अल्पवयीन असतानाच वानखेडे हे मद्यालय चालवत असल्याचा त्यांच्यावर आरोप आहे. यामुळेच त्यांचा मद्य परवाना रद्द करून त्यांच्याविरोधात गुन्हा दाखल केला होता. त्याविरोधात वानखेडे यांनी उच्च न्यायालयात धाव घेतली आहे. न्या. अजय गडकरी आणि न्या. रणजितसिंह भोसले यांच्या खंडपीठापुढे सोमवारी सुनावणी झाली.