झाडे तोडून फूड प्लाझाची निर्मिती
नागरिकांचा विरोध
कल्याण, ता. ७ (वार्ताहर) : ऐतिहासिक काळा तलावाचे (भगवा तलाव) स्मार्ट सिटी प्रकल्पांतर्गत सुशोभीकरण करण्यात आले होते. त्या वेळी फूड प्लाझा तयार केला होता; मात्र हा फूड प्लाझा अजूनही सुरू झाला नसताना, तलावाच्या सभोवताली असलेल्या हिरव्या बगिच्यात लोखंडी फूड काउंटर उभारण्याचे काम जोरात सुरू आहे. या प्रक्रियेत अनेक झाडे तोडली गेली आहेत, ज्यामुळे पर्यावरणप्रेमी आणि स्थानिक नागरिकांची चिंता वाढली आहे.

तलावाच्या निसर्गसौंदर्याच्या परिसरात रोज सकाळ-संध्याकाळी हजारो लोक चालणे, व्यायामासाठी येतात; मात्र आता फूड स्टॉल उभारल्याने गर्दी आणि गोंधळ वाढेल, तसेच नैसर्गिक वातावरणाचा समतोल बिघडेल, अशी भीती व्यक्त केली जात आहे. पक्षिप्रेमींनीदेखील या फूड स्टॉलमुळे पक्ष्यांच्या अधिवासावर परिणाम होण्याची शक्यता असल्याचे म्हटले आहे. स्थानिक नागरिकांनी फूड स्टॉलमुळे परिसरातील स्वच्छता आणि सौंदर्यावर नकारात्मक परिणाम होईल. त्यामुळे या उपक्रमाला तीव्र विरोध केला आहे. अनेकांनी म्हटले की, आधीच या ठिकाणी सोयींचा अभाव आहे; एक ओपन जिम आहे, पण त्याची देखभाल नाही. आता फूड प्लाझा सुरू केल्यास परिसर अधिक घाणेरडा होईल, अशी शंका व्यक्त केली जाते.

सामाजिक कार्यकर्ते श्रीनिवास घाणेकर यांनी म्हटले की, हे फूड स्टॉल बेकायदेशीर आहेत. यावरून प्रशासनाच्या धोरणांवर प्रश्नचिन्ह निर्माण झाले आहे. दुसरीकडे, उपायुक्त संजय जाधव यांनी माहिती दिली की, काळा तलाव परिसरात बोटिंग, फिशिंग, फॉन्टन्स, लेजर शो यांसारख्या पर्यटकांसाठी विविध सुविधा सुरू होणार आहेत. त्यासाठी फूड स्टॉल मोकळ्या जागेत उभारले जातील आणि कोणत्याही झाडाला नुकसान पोहोचवले जाणार नाही, असे त्यांनी स्पष्ट केले. ही कामे निविदा प्रक्रियेनुसार पार पडत असल्याचेही सांगितले. नागरिक आणि पर्यावरणप्रेमींना प्रशासनाने डोळस दृष्टिकोन ठेवून बगिच्याचे सौंदर्य आणि निसर्गसंपदा जपण्याकडे लक्ष देण्याची मागणी जोर धरत आहे. आता प्रशासनाने स्थानिकांची चिंता ऐकून पर्यावरण आणि विकास यामध्ये संतुलन साधण्याचे पाऊल उचलले पाहिजे.