मुंगोशी गावात दूषित पाणी
जलबोगद्याविरोधात ग्रामस्थ आक्रमक
पेण, ता. ११ (वार्ताहर) ः हेटवणे धरणाचे पाणी नवी मुंबईला घेऊन जाण्यासाठी सिडकोच्या माध्यमातून जिते, बेलवडे याठिकाणी जलबोगद्याचे काम सुरू आहे; पण या कामामुळे मुंगोशी गावाला दूषित पाणीपुरवठा होत असल्याने ग्रामस्थ आक्रमक झाले आहेत.
पेण तालुक्यातील प्रांताधिकारी कार्यालय येथे खासदार धैर्यशील पाटील यांच्या उपस्थितीत बैठक घेण्यात आली. या बैठकीला प्रांताधिकारी प्रवीण पवार, जि.प. माजी सभापती डी. बी. पाटील, सामाजिक कार्यकर्ते हरीश बेकावडे, बेलवडे सरपंच हरेश पाटील, सिडको अधिकारी राजेंद्र पोतदार, मेघा इंजिनिअर कंपनी अधिकारी पी. अरुण, पोलिस उपनिरीक्षक विक्रम नवरखेडे मोठ्या संख्येने उपस्थित होते. या वेळी ग्रामस्थांनी दूषित पाण्यासंदर्भात कंपनीकडे तक्रार केली आहे; मात्र त्याकडे सातत्याने दुर्लक्ष होत असून दोन दिवसांपूर्वी कंपनी गेटजवळ चार-पाच गावगुंडांना बोलावून धक्काबुक्की केली होती. याबाबत खासदार धैर्यशील पाटील यांनी नाराजी व्यक्त करताना कंपनीने ग्रामस्थांशी सौजन्याने वागावे, असे सांगितले.
-------------------------
ग्रामस्थांच्या मागण्या
कंपनीकडून होत असलेला दूषित पाणीपुरवठा बंद करून स्वच्छ पाणीपुरवठा करावा, कंपनीच्या आवारातील सुरक्षा रक्षकांना तत्काळ काढून टाकावे, सीएसआर फंडाच्या माध्यमातून गावांचा विकास करावा, गावातील मुलांना नोकरीत सामावून घ्यावे, अशा विविध मागण्या ग्रामस्थांनी केल्या आहेत, अन्यथा सिडको तसेच कंपनीविरोधात तीव्र आंदोलन छेडण्यात येईल, असा इशारा सामाजिक कार्यकर्ते हरीश बेकावडे यांनी दिला आहे.
--------------------------------
मुंगोशी ग्रामस्थांच्या मागण्यांबाबत सकारात्मक विचार केला जाईल. गावाला स्वच्छ पाणीपुरवठा तसेच दोघा सुरक्षा रक्षकांची ताबडतोब बदली करण्यात येईल.
- पी. अरूण, अधिकारी, मेघा इंजिनिअर कंपनी
--------------------------------
दूषित पाण्याबाबत ग्रामस्थांची तक्रार होती. त्यानुसार आज बैठक घेण्यात आली. ग्रामस्थांना शुद्ध पाणी दिले जाणार आहे.
- राजेंद्र पोतदार, सिडको अधिकारी