जिल्हास्तरीय ‘व्हॉलीबॉल’ स्पर्धेला प्रतिसाद
नेरुळ, ता.११(बातमीदार) ः क्रीडा व युवक सेवा संचालनालय, महाराष्ट्र राज्य अंतर्गत जिल्हा क्रीडा परिषद ठाणे व जिल्हा क्रीडा अधिकारी कार्यालय ठाणे यांच्या सहकार्याने जिल्हास्तरीय शालेय क्रीडा स्पर्धांचे आयोजन केले आहे. जिल्हास्तरीय शालेय व्हॉलीबॉल स्पर्धा टिळक ज्युनिअर कॉलेज ऑफ कॉमर्स ॲन्ड सायन्स, नेरुळ येथील मैदानावर पार पडले.
या स्पर्धेत १५३ शाळांनी सहभाग घेतला होता. या स्पर्धेचे उद्‍घाटन आंतरराष्ट्रीय व्हॉलीबॉलपट्टू, राज्य व्हॉलीबॉल असोसिएशनचे अध्यक्ष संजय नाईक यांच्या हस्ते, टिळक ग्रुप ऑफ स्कूलचे संचालक डॉ.अजित कुरुप, प्राचार्या डॉ. हिना समानी, क्रीडा अधिकारी रेवप्पा गुरव, जिल्हास्तर शालेय क्रीडा स्पर्धा आयोजन समिती सदस्य धनंजय वनमाळी, शैक्षणिक प्रशासक अनिल नायर व सुनिल नायर, इतर सर्व शाखांचे प्राचार्य आणि पर्यवेक्षक व निवेदिका टिना यांच्या उपस्थितीत झाले.
१४ वर्षाआतील वयोगटाच्या मुलांचा अंतिम सामना नॉर्थ पॉईंट स्कूल कोपरखैरणे आणि साधू वासवानी स्कूल सानपाडा यांच्यात होऊन यामध्ये नॉर्थ पॉईंट स्कूल, कोपरखैरणे शाळेच्या संघाने अत्यंत चुरशीच्या लढतीत २५-२२, २३-२५, २५-२१ असे २:१ अजिंक्यपद पटकावून मुंबई विभाग स्तर स्पर्धेसाठी पात्र ठरला आहे.
या मुलांच्या १९ वर्षाआतील वयोगटातील अंतिम सामना सुशिलादेवी देशमुख ज्युनिअर कॉलेज, ऐरोली आणि एस. एस. हायस्कूल, नेरुळ यांच्यात होऊन या सामन्यात सुशिलादेवी देशमुख ज्युनिअर कॉलेज, ऐरोलीच्या संघाने अत्यंत चुरशीच्या लढतीत २७-२५, १५-२५,२५-२१ अशा २:१ सेटमध्ये सामना जिंकत अजिंक्यपद पटकावून मुंबई विभाग स्तर स्पर्धेसाठी पात्रता संपादन केली.
स्पर्धेतील १९ वर्षाआतील मुलींच्या गटातील अंतिम सामना नॉर्थ पॉईंट स्कूल, कोपरखैरणे आणि अमृता विद्यालय, नेरुळ यांच्यात होऊन या अंतिम सामन्यात नॉर्थ पॉईंट स्कूल कोपरखैरणे शाळेच्या संघाने २५-१५,२५-१६ अशा सरळ दोन सेटमध्ये सामना जिंकून मुंबई विभागीय स्पर्धेसाठी पात्रता सिध्द केली.