टोरंट वीज कंपनीविरोधात दिव्यात धडक मोर्चा
सकाळ वृत्तसेवा
ठाणे, ता. १२ : टोरंट वीज कंपनीच्या मनमानी कारभाराविरोधात आणि काही मागण्यांसाठी शुक्रवारी (ता. १७) चंद्रांगण टॉवर (टोरंट ऑफिस) येथे धडक मोर्चा काढण्यात येणार आहे. दिव्यातील बेडेकर नगर लो-प्राईज मार्ट येथून मोर्चा काढण्यात येणार आहे. टोरंट कंपनीच्या अन्यायाविरोधात आवाज उठवण्यासाठी दिवेकर नागरिकांनी मोठ्या संख्येने उपस्थित राहावे, असे आवाहन समाजसेवक अमोल केंद्रे यांनी केले आहे. दिव्यातील रहिवाशांचे ३ महिन्यांचे बिल थकीत असेल तर त्यानंतर लाईट कापण्यात यावी. बिल भरल्यानंतर लाईट जोडण्यासाठी कोणतेही शुल्क घेण्यात येवू नयेत तसेच टोरंट कंपनीने प्रति युनिट जी दीड रुपये केलेली वाढ तत्काळ रद्द करावी यासाठी हा मोर्चा काढण्यात येत आहे. या मागण्या मान्य होत नाहीत तोपर्यंत टोरंट पॉवर ऑफिससमोरच ठिय्या आंदोलन करण्यात येईल, असेही केंद्रे यांनी स्पष्ट केले आहे.