बोधगयामध्ये बौद्ध
त्रिपिटक परिषद
मुंबई, ता. १३ ः लाइट ऑफ बुद्धधर्म फाउंडेशन इंटरनॅशल यांच्या वतीने येत्या २ ते १३ डिसेंबर रोजी बोधगया येथे आंतरराष्ट्रीय बौद्ध त्रिपिटक परिषदेचे आयोजन केले आहे. बोधगया परिसरातील पर्यटनाला चालना मिळावी तसेच बुद्घ तत्त्वज्ञानाचा प्रसार व्हावा, हा या परिषदेचा उद्देश असल्याचे इंटरनॅशनल त्रिपिटक चाटिंग कॉन्सिलचे अध्यक्ष भन्ते संघसेना (लेह) यांनी येथे एका पत्रकार परिषदेत स्पष्ट केले.
परिषदेच्या उद्‍घाटन समारंभाला बिहारचे राज्यपाल मोहम्मद आरिफ खान, कर्नाटकचे गृहमंत्री जी. परमेश्वर, अरुणाचल प्रदेशचे मुख्यमंत्री पेमा खांडू उपस्थित राहणार आहेत. तसेच ३ ते १२ डिसेंबर रोजी होणाऱ्या विविध समारंभांत केंद्रीय मंत्री नितीन गडकरी, किरण रिजिजू, गजेद्रसिंह शेखावत आणि केंद्रीय राज्यमंत्री रामदास आठवले उपस्थित राहणार असल्याची माहिती अध्यक्ष भन्ते संघसेना यांनी दिली.
१० दिवस होणाऱ्या या परिषदेत बोधीवृक्षाच्या सान्निध्यात बौद्ध धर्मगुरूंचे प्रवचन, प्रश्नोत्तरे, आर्ट गॅलरी, देश-विदेशातील सांस्कृतिक कार्यक्रम होणार आहेत. भारतातून २० हजार तर परदेशातून पाच हजार बौद्ध प्रतिनिधी उपस्थित राहणार असल्याचे त्यांनी सांगितले. या वेळी सचिव भन्ते विनय रख्खिता, उपाध्यक्ष भन्ते अग्रधम्म (अरुणाचल प्रदेश), भिक्षूणी अय्या धम्मदीना आदी उपस्थित होते.