पश्चिम रेल्वेची शंभर टक्के वक्तशीरपणाची ऐतिहासिक कामगिरी

सकाळ वृत्तसेवा
मुंबई, ता. २३ : पश्चिम रेल्वेच्या मुंबई सेंट्रल विभागाने २२ ऑक्टोबर रोजी मेल-एक्स्प्रेस गाड्यांच्या धावण्यात शंभर टक्के वक्तशीरपणाची ऐतिहासिक नोंद केली आहे. ही कामगिरी विभागाच्या कार्यक्षम नियोजनाची आणि वेळेच्या काटेकोर पालनाची साक्ष देत असल्याचे पश्चिम रेल्वे प्रशासनाकडून सांगण्यात आले. विशेष म्हणजे, दिवाळी आणि छटपूजेच्या काळात विशेष गाड्या धावत असतानाच ही ऐतिहासिक कामगिरी साध्य करण्यात आली आहे.

पश्चिम रेल्वेचे मुख्य जनसंपर्क अधिकारी विनीत अभिषेक यांनी दिलेल्या माहितीनुसार, दिवाळी आणि छटपूजा पर्वाच्या पार्श्वभूमीवर सध्या विभागातून मोठ्या प्रमाणावर विशेष गाड्या चालवल्या जात आहेत. अशा गर्दीच्या आणि आव्हानात्मक काळातही गाड्यांचे वक्तशीरपण राखणे ही उल्लेखनीय कामगिरी असल्याचे त्यांनी सांगितले. काळजीपूर्वक नियोजन, विभागांमधील समन्वय आणि कर्मचाऱ्यांच्या समर्पित टीमवर्कमुळे ही कामगिरी शक्य झाली, असेही त्यांनी स्पष्ट केले. पश्चिम रेल्वेचा मुंबई सेंट्रल विभाग हा देशातील सर्वाधिक वर्दळीच्या रेल्वे विभागांपैकी एक असून, ६०० किलोमीटरहून अधिक लांबीच्या मार्गावर दररोज १,४०० हून अधिक उपनगरी गाड्या आणि सुमारे १५० मेल-एक्स्प्रेस गाड्यांचे संचालन केले जाते. पश्चिम रेल्वेने प्रवाशांना सुरक्षित, विश्वासार्ह आणि कार्यक्षम सेवा देण्याच्या आपल्या बांधिलकीचा पुनरुच्चार करताना ही कामगिरी रेल्वे कर्मचाऱ्यांच्या समर्पण आणि व्यावसायिकतेचा अभिमानास्पद पुरावा असल्याचे म्हटले आहे.