एकतर्फी प्रेमातून जीवघेणा हल्ला
नवी मुंबई (वार्ताहर) : नेरूळ येथील २८ वर्षीय तरुणाने एकतर्फी प्रेमातून १८ वर्षीय तरुणीवर अतिप्रसंग करण्याचा प्रयत्न केला. या वेळी पीडितेने विरोध केल्याने तिला सळईने हल्ला करून जखमी केले. याप्रकरणी पोलिसांनी तिघांवर गुन्हा दाखल केला आहे.
पीडित तरुणी सानपाडा परिसरात भावासह राहते. २० ऑक्टोबर रोजी रात्री ११च्या सुमारास पीडित तरुणी आणि तिचा भाऊ हे दोघे घरामध्ये असताना आरोपी राजेंद्र सहानी (२८) हा तीन साथीदारांसह घरामध्ये घुसला. झोपलेल्या पीडित तरुणीला जागे करून तिच्यावर प्रेम असल्याचे सांगितले. तसेच त्याने तिच्यासोबत शारीरिक संबंध ठेवण्याची इच्छा व्यक्त केली. पण पीडितेने त्याला विरोध केल्याने आरोपी राजेंद्र सहानीने लोखंडी सळई मारून जखमी केले. या वेळी पीडितेचा भाऊ बहिणीला वाचवण्यासाठी गेला असता त्यालाही मारहाण करण्यात आली. या प्रकरणात पीडित तरुणीने सानपाडा पोलिस ठाण्यात तक्रार दाखल केल्यानंतर आरोपी राजेंद्र सहानीसह चार साथीदारांविरोधात गुन्हा दाखल केला आहे.